Фарғона вилоятида «Ёшлар – келажагимиз» Давлат дастури доирасида 219 та ёшлар меҳнат гузарларини қуриш режалаштирилган. Бу ҳақда «Дарё» мухбири Азизжон Эрматов хабар берди.
Ҳозирги кунга қадар вилоятда 72 та ёшлар меҳнат гузарлари учун қулай бино ва ер майдонлари ажратилди. 39 та ёшлар меҳнат гузарлари ўз фаолиятини бошлади, 20 та объектда эса таъмирлаш ишлари олиб борилмоқда. Фойдаланишга топширилган ёшлар меҳнат гузарларида 429 та доимий иш ўрни яратилди.
Данғара туманида яшовчи Каромат Баҳодировага «Чинобод» маҳалласи марказидаги бўш турган бино янги иш ўринлари яратиш шарти билан «нол» қийматда берилди. Тадбиркор қиз банкдан ажратилган 250 миллион сўм имтиёзли кредит эвазига ёшлар меҳнат гузари ташкил қилиб, тикувчилик цехини ишга туширди. Тез орада мазкур цехда 100 нафар ёшлар иш бошлайди.
Меҳнат гузарларини ташкил этишда туманларда шаклланган соҳаларга эътибор берилмоқда. Масалан, Риштон туманида кулолчилик, Бағдод туманида қандолатчилик, Бувайда туманида дурадгорлик, Марғилон, Қўқон шаҳарларида маиший хизмат кўрсатиш йўналишларидаги меҳнат гузарлари очилмоқда.
Жорий йил охирига қадар Фарғона вилоятида «Ёшлар – келажагимиз» Давлат дастури асосида ёшлар бандлигини таъминлашга қаратилган 424 лойиҳа амалга оширилади ва 2842 нафар ёшлар иш билан таъминланади.
Изоҳ (0)