2017 йил 14 декабрда Сурхондарё вилояти Узун Қишлоқ хўжалик касб-ҳунар коллежида бўлиб ўтган очиқ сайёр судда интернет орқали уруш ва беҳаёликни тарғиб қилувчи фото-видео материалларни эълон қилиш мавзусидаги ҳуқуқбузарлик иши кўриб чиқилди. Бу ҳақда Узун тумани маъмурий ишлар бўйича суди «Дарё»га маълум қилди.
Узун тумани Дўстлик маҳалласида яшовчи 29 ёшли Нодиржон Мамадалиев ўрта маълумотга эга. У мустақил равишда интернетда ишлаш, сайт юритиш борасида тажриба тўплаган – бу яхши. Лекин у ўрганганларини яхши мақсадларга йўналтирмагани афсусланарли, дейилади хабарда.
Нодиржон Мамадалиев 2016 йилда тегишли тартибда «www.tengsiz.uz» домен номини расмийлаштириб, фото, видео ва матнли хабар узатиш имкониятига эга шахсий веб-сайтни ишга туширади. Аввалига кино, мусиқа олами, шеърият, тарих, саломатлик мавзуларида материалларни эълон қилиб боради. Кейинчалик бу ахборотлар таркибига эр-хотинлик муносабатлари мавзусидаги ахлоқсиз савол-жавоб тарзида қилинган маърузалар, эр-хотин муносабатлари мавзусидаги ҳадисларнинг изоҳсиз таржимасини ҳавола қила бошлайди.
Бундан ташқари, сайтга шафқатсизлик ва зўравонликка ундовчи, беҳаёликни тарғиб қилувчи порнографик ўндан ортиқ кинофильмлар жойланади.
Ўзбекистон Республикаси Маънавият тарғибот марказининг эксперт комиссияси томонидан берилган хулосада веб-сайтга жойлаштирилган бир қатор материаллар ахлоқий бузуқлик, зўрлаш, таҳқирлаш ва бошқа иллатлар тарғиб этилгани, бу фильмларни намойиш этиш, кўриш, тарғибот қилиш мумкин эмаслиги айтилади.
Юқорида қайд этилган материаллар бўйича Ўзбекистон Республикаси Ахборот ва оммавий коммуникациялар соҳасидаги экспертлар гуруҳи томонидан ҳам хулосалар берилди. Унга кўра сайтдаги бир қатор материаллар тегишли рухсатсиз тарқатиш мумкин бўлмаган материаллар сирасига кириши келтирилган.
Нодиржон Мамадалиев бу хатти-ҳаракатлари қонунга хилоф эканлиги борасида домен номини ўзига расмийлаштириб берган корхона томонидан бир неча бор огоҳлантирилади. Лекин у боши деворга бориб тегмагунча ўзига хулоса чиқармайди.
Нодиржон Мамадалиев содир қилган ҳаракати ўзининг суддаги тушунтириши, иқрор бўлишидан ташқари, суриштирув давридаги ариза, тушунтириш хатлари, маъмурий баённомалар ва тўпланган бошқа далиллар билан ўз исботини топди.
Суд ҳуқуқбузарга нисбатан жазо тайинлашда унинг шахсини, оилавий ва моддий аҳволини, айбига иқрор бўлиб, қилган ишидан пушаймонлигини инобатга олиб Маъмурий жиноят кодексининг тегишли моддаларига кўра маълум миқдордаги жаримага тортди.
Изоҳ (0)