Ички ишлар вазири, генерал-майор Пўлат Бобожонов раҳбарлигидаги ишчи гуруҳ жорий йилнинг 12—16 август кунлари Хоразм вилоятининг барча шаҳар ва туман ички ишлар органлари ҳамда вилоят ички ишлар бошқармасида батафсил ўрганишлар олиб бориб, уларнинг якуни бўйича ҳар бир таркибий тузилма ва ходимлар фаолиятига танқидий баҳо берди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Ўрганишлар давомида Ички ишлар вазири Хазорасп, Боғот, Янгиариқ, Хонқа, Урганч туманларида ички ишлар органлари шахсий таркиби билан учрашди. «Хавфсиз шаҳар» концепцияси асосида Урганч шаҳрида ўрнатилаётган видеокузатув мосламаларининг ишлаш жараёнлари билан танишди. Ички ишлар вазирлигига қарашли Хоразм академик лицейида таълим олиш жараёнлари учун шароитларни яхшилаш мақсадида, лицейга замонавий спорт анжомлари совға қилинди ҳамда лицей кутубхонасини бадиий адабиётлар билан бойитиш бўйича топшириқлар берилди.
Ўрганишлар якуни бўйича Президент девони, Бош прокуратура, вилоят ҳокимлиги ва ички ишлар органлари масъул ходимлари иштирокида йиғилиш бўлиб ўтди. Унда жорий йилнинг ўтган даври мобайнида Хоразм вилоятида жиноятчиликнинг олдини олиш борасида амалга оширилган чора-тадбирлар натижасида умумий жиноятлар 781 тага ёки 41,4 фоизга, жиноят қидирув соҳасидаги жиноятлар 434 тага ёки 41,1 фоизга камайганлиги қайд этилди.
Ўз навбатида, вилоятнинг айрим ички ишлар органлари ходимларининг фуқаролар билан муносабатларда ноўрин ҳатти-ҳаракатлари, раҳбарларнинг масъулиятсизлиги ва бепарволиги ҳамда уларнинг қўл остидаги ходимлари устидан кунлик назоратни лозим даражада олиб борилмаётганлиги оқибатида йўл қўйилган камчиликлар аҳолининг ҳақли эътирозига сабаб бўлаётганлиги кўрсатиб ўтилди.
Республиканинг бошқа ҳудудларида бўлгани каби Хоразм вилоятида ҳам жиноятчиликнинг туб илдизига тўлиқ етиб борилмаётганлиги, жиноятларнинг асл сабаблари ўрганилмасдан, маҳалла, меҳнат жамоалари ва таълим муассасаларидаги муҳокамалар номига ташкил қилиниб, расмиятчилик билан ўтказилишига йўл қўйилаётганлиги танқид қилинди.
Хусусан, вилоятда жорий йилнинг 7 ойи мобайнида жиноятчилик камайганига қарамасдан, айрим ҳудудларда криминоген вазият бирмунча оғирлашган. Шовот ва Янгиариқ туманларида қотиллик, Хонқа, Урганч ва Қўшкўпир туманларида оғир шикаст етказиш жиноятлари кўпайган.
Маҳаллаларда фуқаролар ўртасидаги ўзаро келишмовчиликлар ва уларни ўз вақтида бартараф этиш чоралари кўрилишига жиддий ва масъулиятли ёндашилмаётганлиги оқибатида жорий йилнинг 7 ойи мобайнида 3 та қотиллик ва 17 та тан жароҳати етказиш жиноятлари оила-турмуш муносабатлари доирасида содир этилган.
Шовот, Гурлан, Хазорасп, Қўшкўпир туманлари ва Хива шаҳрида июнь ва июль ойиларининг ўзида жиноят қидирув йўналиши бўйича содир этилган жиноятлар сони кескин ошган. Урганч шаҳрида жиноятларнинг 77 таси кўчаларда, 69 таси эса қўриқлашга олиниши лозим бўлган объектларда содир этилганлиги қайд этилиб, жамоат тартибини сақлаш ва қўриқлаш соҳасидаги чора-тадбирларни кучайтириш бўйича топшириқлар берилди.
Муҳокамалар давомида эгаллаб турган лавозимига нолойиқ хатти-ҳаракатларни содир этган, соҳада амалга оширилаётган ислоҳотларнинг мазмун-моҳиятини тўлақонли англаб етмасдан, бугунги кун талабларига жавоб бермайдиган эскича иш услубида хизмат қилаётган, ўз устида ишламасдан, фуқароларнинг манфаати йўлида жонбозлик кўрсатмаган Янгибозор тумани ИИБ бошлиғи вазифасини бажарувчи Ж.Пирязов, ИИБ бошлиғининг ёшлар масалалари бўйича ўринбосари Ю.Ахмедов, Жиноят қидирув бўлинмаси бошлиғи И.Салаев, Урганч тумани ИИБ бошлиғининг ёшлар масалалари бўйича ўринбосари Ш.Жуманазаров, Қўшкўпир тумани ИИБ бошлиғининг биринчи ўринбосари Ш.Ҳасанов, Янгиариқ тумани ИИБ бошлиғининг хизмат бўйича ўринбосари Х.Нурметов эгаллаб турган лавозимларидан озод этилди.
Шунингдек, фаолиятида йўл қўйган камчиликлар, хизмат вазифаларини бажаришга масъулият билан ёндашмаган қатор раҳбар ва ходимларга турли даражадаги интизомий жазо чоралари қўлланилди.
Изоҳ (0)