Оққўрғонда уч болани ўлдириб, ўз ҳовлисига кўмиб қўйган шахс умрбод қамоқ жазосига ҳукм қилинди

Жиноят ишлари бўйича Тошкент вилояти суди 8 йил давомида уч нафар вояга етмаган болани ўлдирган Зоҳид Отабоевни умрбод қамоқ жазосига ҳукм қилди. Бу ҳақда Бош прокуратура ҳузуридаги мультимедиа марказига таяниб, «Газета.uz» хабар берди.

Тергов аввалроқ Тошкент вилоятининг Оққўрғон тумани «Хонобод» МФЙда яшовчи, 1988 йилда туғилган Зоҳид Отабоев Ш.М. (2003 йилда туғилган), Ё.У (2005) ва О.С. (2014) ларнинг жасадини ўз ҳовлисига кўмиб қўйганини аниқлаган эди.

Отабоевга нисбатан Жиноят кодексининг 97-моддаси 2-қисми «а» ва «в» бандлари (Жавобгарликни оғирлаштирадиган ҳолатларда — икки ёки ундан ортиқ шахсни, айбдорга аён бўлган ожиз аҳволдаги шахсни қасддан ўлдириш) бўйича жиноят иши қўзғатилганди.

Жазодан муддатидан илгари шартли равишда озод қилиш умрбод ёки узоқ муддатга озодликдан маҳрум қилинган шахсларга нисбатан қўлланилмайди.

Отабоевнинг жинояти бўйича Бош прокуратура медиа маркази томонидан тайёрланган сюжет бугун, 4 август куни соат 18:10 дан бошлаб «Ўзбекистон 24» телеканалидаги «Қонун номи билан» кўрсатувида намойиш этилади.