АҚШнинг Техас штатидаги Сан-Антонио шаҳрида жойлашган окаэнариумдан Мисс Ҳелен лақабли кичик акула ўғирлаб кетилди. Ўғрилар уни тутиб, нам ёпинғичга ўраган ва сув тўлдирилган челакка солган. Ўз навбатида, челак болалар аравачасига жойлаштирилган. Шундан сўнг улар автомобилда ғойиб бўлган. Бу ҳақда Meduza хабар берди.
Хабар берилишича, ўғриликда икки нафар эркак ва бир аёл иштирок этган. Ўғирланган жонивор шохли акулалар турига киради, унинг узунлиги 40 сантиметрни ташкил қилади.
Ҳодиса 28 июлда юз берган. Полиция ўғриларни 30 июлда қўлга олган. Бунда кузатув камераларига тушиб қолган жиноятчиларнинг машинасини таниб қолган маҳаллий аҳоли ёрдам берган. Тасвирлар маҳаллой ОАВларда намойиш этилган.
Акула ўғрилардан бирининг гаражидан топилган. Хабар қилинишича, унинг коллекциясида кўплаб балиқлар ва денгиз жониворлари бўлган.
Жиноятда гумонланаётганлардан бири қамоққа олинган. Жиноятчилар жаримага тортилиши мумкин — акуланинг нархи икки минг долларга баҳоланмоқда.
Изоҳ (0)