Мельбурн (Австралия)даги Монаш университети олимлари 2080 йилга келиб, тропик ва субтропик минтақаларда жазирама қурбонлари сони деярли беш марта ошади, деган хулосага келди. Бунга экстремал об-ҳаво воқеликларининг кўпайишига олиб келувчи антропоген иқлим ўзгаришлари сабабчи бўлади. Бу ҳақда EurekAlert! сайтидаги пресс-релизда айтилади.
Тадқиқотчилар 2031—2080 йилларда 20 та мамлакатда жазирама билан боғлиқ ўлимлар сонини баҳолаш учун модель ишлаб чиқди. Бунда атмосферага чиқарилаётган иссиқхона газлари ҳажми, минтақалардаги аҳолининг зичлиги, шунингдек, жазирама оқибатларини юмшатиш бўйича турли стратегиялар эътиборга олинди.
Энг пессимистик сценарийга кўра, Австралиянинг Брисбен, Сидней ва Мельбурн шаҳарларида об-ҳаво фалокатларидан ўлиш даражаси 1971—2010 йиллар билан таққослаганда 471 фоизга ошиб кетади. Қурбонлар сони Ҳиндистон, Греция, Япония ва Канадада сезиларли равишда ўсади.
Олимлар фикрича, Париж битимига риоя қилинган тақдирда, прогноз қилинаётган оқибатлар анча юмшайди.
Париж битими иқлим ўзгариши 2020 йилдан атмосферада иссиқхона газлари миқдорини камайтириш юзасидан чора-тадбирларни тартибга солиш бўйича Бирлашган Миллатлар Ташкилотининг дастлабки конвенцияси доирасида қабул қилинган ҳужжат ҳисобланади. Мазкур битим 2015 йил 12 декабрда Парижда бўлиб ўтган Иқлим бўйича конференцияси чоғида Киото протоколининг ривожи сифатида қабул қилинган. Битимдан кўзланган мақсад БМТнинг иқлим ўзгариши бўйича дастлабки конвенцияси «ҳаётга тадбиқ этилишини фаоллаштириш», хусусан, ҳароратнинг глобал ўсишини Цельсий шкаласи бўйича ўртача 2 даражадан паст ҳолатда ушлаб туриш ва ҳарорат ўсиши 1,5 даражада чекланиши учун саъй-ҳаракатларни ишга солиш билан изоҳланади.
Изоҳ (0)