Фарғонада 30 дан ортиқ мамлакат иштирокида биринчи халқаро жанг санъатлари фестивали бўлиб ўтди (фото)

Фарғона ва Марғилон шаҳарларида биринчи халқаро жанг санъатлари фестивали бўлиб ўтди. Унда Жанубий Корея, Гана, Мўғулистон, Филиппин, Нидерландия, АҚШ, Россия, Беларусь, Франция каби дунёнинг 30 дан ортиқ мамлакатидан 150 дан зиёд спортчи ва 500 га яқин меҳмонлар иштирок этди, деб хабар беради «Дарё» мухбири Азизжон Эрматов.

Халқаро фестиваль аввалида ЮНЕСКО ҳомийлиги остида жаҳон жанг санъатлари уюшмасига аъзо давлатлар 17-Бош ассамблеяси йиғилиши ўтказилди. Унда жаҳон жанг санъатлари уюшмасига аъзо 26 та давлат вакиллари қатнашди.

Шунингдек, «Жанг санъати ва ипак йўлидаги маданият» мавзусида академик семинар бўлиб ўтди. Унда жаҳон жанг санъати тарихи, ипак йўли ва жанг санъати, ўтказилаётган чемпионатлар, ўйин қоидалари, ЮНЕСКО ва номоддий маданий мерос каби масалалар бўйича маълумот берилди.

Жанубий Кореянинг Чунг Жу шаҳар ҳокимлиги ва Таккён уюшмаси ҳамда «Ўзбек жанг санъати» федерацияси ва Фарғона вилояти ҳокимлиги ўртасида меморандум имзоланди.

Урф-одатларимизга кўра, меҳмонларга миллий либослар, миллий ҳунармандчилик намуналари ва «Ўзбек жанг санъати» спорт формалари топширилди.

Фестиваль иштирокчилари Марғилон шаҳридаги 2-болалар ва ўсмирлар спорт мактабида ўзбек жанг санъати бўйича спортчиларнинг кўргазмали чиқишларини кузатди.

Шунингдек, мазкур спорт мактабида 20 дан ортиқ давлат спортчилари ўзларининг урф-одати, тарихи ва жанг санъатини намоён этувчи кўргазмали чиқишларини намойиш қилди. Жанубий Корея, АҚШ, Индонезия, Мўғулистон ҳамда ўзбекистонлик спортчиларнинг дастурлари юқори баҳоланди.

Кеча, 30 июль санасида Ислом Каримов номидаги вилоят театр-концерт саройида I халқаро жанг санъатлари фестивалининг тақдирлаш маросими ўтказилди.

Жаҳон жанг санъати уюшмасининг президенти Чонг Хуа, Кения «Жанг санъати» уюшмасининг вице-президенти Кеннеди Жошуа Ожвандо, «Ўзбек жанг санъати» федерацияси раиси Пўлат Усмонов ва Фарғона вилояти ҳокимининг ўринбосари Илҳомжон Носиров ғолибларни тақдирлади.

Фестиваль давомида ўзининг қизиқарли чиқишлари билан эътибор қозонган спортчилар «Ўзбек жанг санъати» уюшмасининг медалларига эга бўлди.

– Ҳар йили Жанубий Кореяда ўтказиладиган фестивални бу йил Ўзбекистонга – Фарғона вилоятига ишониб топширгандик. Чунки, фарғоналик спортчилар ҳар йили мазкур фестивалда ўз чиқишларини моҳирона намойиш қилиб, муваффақиятли иштирок этган. Фарғонада халқаро фестивалга жуда юқори даражада тайёргарлик кўрилибди, – дейди Жанубий Корея делегацияси раҳбари Чё Гил Хёнг.