Тошкентдаги Шайхонтоҳур тумани бош имом хатиби вазифасидан озод этилди

20 июль, жума куни Мусулмонлар идораси раҳбари, муфтий Усмонхон Алимов буйруғига кўра Тошкентдаги «Шайх Зайниддин» масжиди имом хатиби Одилхон қори Юнусхон ўғли вазифасидан озод этилди. Бу ҳақда «Kun.uz» хабар бермоқда.

«Шайх Зайниддин» масжиди имом хатиби лавозимига Тошкентнинг Чилонзор тумани бош имом хатиби Ҳусниддин Абдукаримов тайинланди.

Одилхон қори Юнусхон ўғлининг нима сабабдан лавозимидан озод этилганига аниқлик киритилмаган.

Одилхон қори Юнусхон ўғли 1998–1999 йилларда Тошкентнинг Учтепа туманидаги «Ҳазрати Умар» жоме масжиди имом хатиби, 1999–2000 йилларда Шайхонтоҳур туманидаги «Шайх Зайниддин» жоме масжиди имом ноиби, 2010-2011 йилларда Тошкент шаҳар бош имом хатиби ўринбосари лавозимларида ишлаган. 2011 йили Шайхонтоҳур тумани бош имом хатиби ва «Шайх Зайниддин» жоме масжиди имом хатиби лавозимига тайинланган.

Одилхон қори Юнусхон ўғлининг «Озодалик имоннинг гўзал баҳоси», «Масжид одоблари», «Рўза тутиш одоблари», «Ҳаж маноциклари», «Исрофдан сақланайлик», «Меҳр-оқибат жаннат гаровидир» номли рисолалари чоп этилган. Унинг «Кибрдан сақланайлик», «Жаннат калити», «Қўшничилик ҳақлари ва одоблари» китоблари айниқса машҳур.

Ҳозирда Одилхон қори Юнусхон ўғлининг раҳбарлиги остида «Muxlis.uz» сайти фаолият юритиб келмоқда.