Тошкент олий умумқўшин қўмондонлик билим юртининг 100 йиллиги муносабати билан 12 июль куни Қуролли Кучлар академиясида тантанали тадбирлар бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.
Тантанали тадбирда мудофаа вазири генерал-майор Абдусалом Азизов, Мустақил Давлатлар Ҳамдўстлигига аъзо мамлакатлар ва бошқа давлатларда истиқомат қилувчи билим юртининг битирувчи-фахрийлари, Ўзбекистондаги хорижий мамлакат элчихоналарининг ҳарбий атташелари, Ўзбекистон Қуролли Кучлари фахрийлари, ҳарбий хизматчилар ҳамда давлат ва жамоат ташкилотлари вакиллари иштирок этди.
Билим юртининг саф майдонида шахсий таркибни ҳамда ушбу даргоҳни тамомлаган фахрий меҳмонларни Мудофаа вазири Абдусалом Азизов ва хорижий давлат вакиллари муборакбод этишди.
Шундан кейин тадбир иштирокчилари Ватан ҳимояси йўлида жон фидо қилган ушбу даргоҳнинг барча даврдаги битирувчилари шарафига атаб ўрнатилган ёдгорлик пойига гулчамбар қўйиш маросими бўлиб ўтди.
Эслатиб ўтамиз, 12 июль куни Тошкент олий умумқўшин қўмондонлик билим юрти ташкил топганлигига 100 йил тўлди. 11 июль куни «Олий ҳарбий таълим муассасасининг Қуролли Кучлар ва Ватан ҳимояси учун офицер кадрлар тайёрлашдаги тарихий ҳиссаси» мавзусида халқаро ҳарбий-илмий анжуман бўлиб ўтганди.
Гулчамбарларни қўйиш маросимидан сўнг, меҳмонлар эътиборига фахрий қоровул, ҳарбий оркестр ва курсантларнинг кўргазмали чиқишлари намойиш этилди. Шундан кейин Қуролли Кучлар академияси тарихи музейи, шунингдек, ўқув бинолари ва казарма фондлари бўйлаб экскурсия ташкил қилинди.
Изоҳ (0)