Саноат корхоналари ва автомобиль ювиш шохобчалари учун сув солиғи оширилади

1 октябрдан саноат корхоналари ва автомобилларни ювиш шохобчалари учун сув ресурсларидан фойдаланганлик учун солиқ оширилади. Бу 2 июль куни Ўзбекистон Президенти Шавкат Мирзиёев томонидан имзоланган «Сув ресурсларидан самарали фойдаланиш чора-тадбирлари тўғрисида»ги фармонда кўзда тутилган, деб ёзади «Газета.uz».

Жумладан, автомобилларни ювиш шохобчалари солиқлар йиғиш тизимидан қатъий назар (солиқ йиғишнинг умумий ёки соддалаштирилган тартиби), ҳатто ягона солиқни тўлаган бўлса ҳам, ушбу солиққа тортилади.

Юқоридаги фармонга кўра, 1 октябрдан сув ресурсларидан фойдаланганлик учун қуйидагича солиқ тўланади:

1. Иқтисодиётнинг барча тармоқ корхоналари (2—6-бандларда кўрсатилган корхоналардан ташқари), тадбиркорлик фаолияти жараёнида сув ресусрларидан фойдаланадиган жисмоний шахслар — ерусти сув ресурслари манбалари учун 98,2 сўм, ерости сув ресурслари манбалари учун 124,8 сўм;
2. Саноат корхоналари (3—6-бандларда кўрсатилган корхоналардан ташқари) — ерусти сув ресурслари манбалари учун 300,3 сўм, ерости сув ресурслари манбалари учун 360,0 сўм;
3. Автотранспортлари ювишга ихтисослаштирилган корхоналар — ерусти сув ресурслари манбалари учун 1000,0 сўм, ерости сув ресурслари манбалари учун 1250,0 сўм;
4. Электростанциялар — ерусти сув ресурслари манбалари учун 28,4 сўм, ерости сув ресурслари манбалари учун 42,2 сўм;
5. Коммунал хизмат кўрсатиш корхоналари — ерусти сув ресурслари манбалари учун 53,9 сўм, ерости сув ресурслари манбалари учун 69,7 сўм;
6. Алкогольсиз ичимлик ишлаб чиқарувчи корхоналар:

• алкоголсиз ичимлик ишлаб чиқариш учун фойдаланган сув ҳажми учун — ерусти сув ресурслари манбалари учун 15 870 сўм, ерости сув ресурслари манбалари учун 15870 сўм;
• бошқа мақсадларда — ерусти сув ресурслари манбалари учун 98,2 сўм, 124,8 сўм.