Шавкат Мирзиёев «Ўзбекистон Республикасининг ташқи иқтисодий фаолиятини янада тартибга солиш ҳамда божхона-тариф жиҳатдан тартибига солиш тизимини такомиллаштириш чора-тадбирлари тўғрисида»ги қарорни қабул қилди.
Қарор билан 2019 йил 1 январдан кучга кирадиган импорт божхона ставкалари ва Ўзбекистон ҳудудига олиб кириладиган, аксиз солиғига тортиладиган товарларга аксиз солиғи ставкалари тасдиқланди.
Ҳужжатга мувофиқ, 2018 йил 1 сентябрдан чегара божхона постларида божхона органлари томонидан божхона назоратини ўтказиш чоғида ветеринар, фитосанитар, экологик ва санитар-эпидемиологик назорат ҳам амалга оширилади;
Ўзбекистонга олиб кирилаётган, Иқтисодий ҳамкорлик ва ривожланиш ташкилотига аъзо давлатларнинг аккредитациядан ўтган органлари томонидан мувофиқлик сертификатлари берилган товарларга нисбатан мувофиқликка мажбурий сертификатлаштиришни амалга ошириш талаб этилмайди;
Товарларнинг «эркин муомалага чиқариш (импорт)» режимига божхона расмийлаштируви учун товарларни давлат тилида мажбурий маркировка қилиш талаб этилмайди;
«Божхона омбори» режимида олти ойдан кўп бўлган товарларнинг божхона расмийлаштируви чоғида божхона тўловлари юзасидан тақдим этилган имтиёзлар қўлланилмайди.
Вазирлар Маҳкамаси манфаатдор вазирлик ва идоралар билан биргаликда 2018 йил 1 сентябрга қадар муддатда:
Республикага товарлар олиб киришда божхона тўловлари бўйича имтиёзларни бекор қилиш юзасидан таклифлар киритилишини;
товарларни реализация қилишнинг қулайлигини таъминлаш учун чегара ҳудудларда савдо мажмуаларини ташкил этиш бўйича зарур чора-тадбирлар амалга оширилишини;
Давлат божхона қўмитасининг веб-сайтида товарларнинг божхона чегараси орқали ҳаракати режимини тартибга солувчи барча норматив-ҳуқуқий ҳужжатлар, товарларнинг божхона расмийлаштируви учун зарур бўлган ҳужжатлар, ҳар бир товарга мос равишда божхона божлари ставкалари, ушбу ҳужжатларни берувчи органлар тўғрисидаги батафсил ахборотни, шунингдек, ташқи иқтисодий фаолиятни амалга ошириш учун бошқа маълумотларни реал вақт режимида бепул асосда олиш имконини берадиган «Интеграциялашган тариф» интерактив хизмати жорий этилишини таъминлаш топширилди.
Тадбиркорлик субъектлари томонидан ташқи иқтисодий фаолиятни амалга ошириш чоғида давлат органларига «Интеграциялашган тариф» интерактив хизматида назарда тутилмаган маълумот ва ҳужжатларни талаб этиш ман этилади.
Изоҳ (0)