Хитойда ўзбек миллий матоларини яратиш технологиялари намойиш этилди

Каримов Фонди вакиллари Хитойнинг Ханчжоу шаҳрида бўлиб ўтган анъанавий тўқимачилик дастгоҳлари ва тўқувчилик ҳунари технологияларига бағишланган симпозиумда иштирок этди. Бу ҳақда фонднинг Facebook’даги саҳифасида хабар қилинди.

Симпозиум доирасида Хитой миллий шойи музейида (дунёдаги энг катта шойи музейи) A World of Looms: Weaving Technology and Textile Arts in China and Beyond (Тўқувчилик дастгоҳлари олами: Хитой ва ундан ташқарида тўқувчилик техникаси ва тўқимачилик маҳсулотлари) кўргазмаси бўлиб ўтди. Кўргазмада дунёнинг турли давлатлари, жумладан, Ўзбекистоннинг тўқимачилик дастгоҳлари ва технологиялари намойиш этилди.

Анжуманда Хитой, Япония, Лаос, Индонезия, АҚШ, Ҳиндистон, Нидерландия, Дания, Франция, Мадагаскар ва Ўзбекистондан ташриф буюрган олим ва мутахассислар иштирок этди.

Каримов Фонди вакили — санъатшунос Бинафша Нодир «Ўзбек абр матолари — анъанавий дастгоҳ ва тўқимачилик технологиялари» мавзусида маъруза қилди.

Анжуман доирасида бўлиб ўтган семинарда марғилонлик уста-абрбанд Расул Мирзааҳмедов ўзбек абр матоларини яратиш жараёни ва технологияларини намойиш этди.

2017 йили Фонд томонидан абрбанди усулидаги тўқувчилик мактабига бағишланган «Ўзбек ипагининг гулгун фасли» китоби ўзбек, рус ва инглиз тилларида, чоп қилинган. Шунингдек, марғилонлик машҳур Мирзааҳмедовлар сулоласининг ижодий меросига бағишланган «Авлодларни боғловчи ришта» каталоги нашр этилган.

Тошкент каштачилик санъатини қайта тиклашга бағишланган кўргазмани ташкил этиш ишлари фонд томонидан олиб борилмоқда. Кўргазма 2018 йилнинг кузига режалаштирилган.