Россия ва Ўзбекистон мамлакат жанубида коинотни ўрганишга мўлжалланган «Суффа» радиотелескопи қурилишини биргаликда охирига етказади. Бу ҳақда Россия фанлар академияси президенти Александр Сергеев маълум қилди, хабар бермоқда Sputnik.
Россия фан ва олий таълим вазирлиги ҳамда Россия фанлар академияси вакилларидан иборат делегация Ўзбекистонда бўлди. Ташриф давомида 70 метрли «Суффа» радиотелескопи қурилишини амалга ошириш масалалари муҳокама қилинди. Шунингдек, Майданак обсерваторияси майдонида ҳам яна бир радиотелескопни ишга тушириш имконияти кўриб чиқилди.
— Давлат раҳбарлари даражасида «Суффа» радиотелескопи қурилишини халқаро обсерватория доирасида охирига етказилиши ҳақида бир қарорга келинди. Лойиҳада учинчи давлатлар олимлари иштироки ҳам мақбул бўлар эди, — деди Александр Сергеев.
Тахминларга кўра, телескоп қурилиши 2024 йилда якунига етиши мумкин. Россия томони лойиҳанинг қурилма ва анжомлари, Ўзбекистон эса инфраструктура учун жавоб беради. Лойиҳа қиймати 100 миллион доллар атрофида баҳоланмоқда.
Изоҳ (0)