Қорақалпоқ давлат университетида туризм йўналиши очилди
Бердақ номидаги Қорақалпоқ давлат университетида 2018—2019-ўқув йили учун бакалавриат ва магистратура учун қабул квотаси тасдиқланди. Бу ҳақда ЎзА хабар берди.
Унга кўра, университетда шу йилдан бошлаб туризм таълим йўналиши бўйича мутахассислар тайёрланади.
Туризм йўналиши бўйича жами 40 талаба (шундан 10 нафари грант, 30 нафари контракт асосида) қорақалпоқ, ўзбек ва рус тили гуруҳларига қабул қилинади.
Бундан ташқари, магистратурада ҳам янгидан иккита ихтисослик очилмоқда. Дифференциал тенгламалар ва математик физика, философия (қўллаш соҳаси) ихтисосликларига ҳужжатлар қабул қилинади. Бакалавриатда касбий таълим: экология таълим йўналиши тугатилмоқда.
Жорий йилда университетнинг журналистика йўналиши учун қабул квотаси икки баробарга оширилган, яъни янги ўқув йилидан 40 нафар талаба ўзбек ва қорақалпоқ гуруҳларида таҳсил олади (ўтган йили 20 нафар эди).
Қорақалпоқ давлат университетида 2018—2019-ўқув йили учун бакалавриатга 2290 нафар талаба (ўтган йили 2200), магистратурага эса 113 нафар (ўтган йилда 80) талаба ўқишга қабул қилинади.
