Ўзбекистонда қамоқхоналарнинг тўлиш даражаси 80 фоизгача пасайди, бу афв этиш тамойили қўлланилаётгани, оқлов ҳукмлари кўпайгани ва озодликдан маҳрум қилиш жазоси ҳукмлари камайгани билан боғлиқ. Бу ҳақда Amnesty International халқаро ташкилоти Шарқий Европа ва Марказий Осиё бўйича директори ўринбосари Денис Кривошеев Deutche Welle телерадиоканалига берган интервьюсида маълум қилди, дея хабар беради «Халқ сўзи».
«Агар охирги 5 қилда Ўзбекистонда фақат 5 маротаба оқлов ҳукми чиқарилган бўлса, 2018 йилнинг дастлабки беш ойининг ўзида уларнинг сони 200 тадан ортди. Бу рақамлар кўплаб давлатлар, жумладан, Россияда ҳам оқлов ҳукмлари тобора камайиб бораётган бир шароитда, айниқса, таҳсинга лойиқ. Россияда мазкур кўрсаткич ниҳоятда кам — йилига 0,3 фоизга тенг», — дея таъкидлади у.
Эксперт Ўзбекистонда судьялар агар айбланувчининг айбига ишонч ҳосил қилмаса, ўзининг профессионал бурчини бажариш мақсадида шубҳа-гумонларни судланувчининг фойдасига талқин этаётгани, иш эса айбдорликни исботлаш йўлида ишончли далиллар аниқланиши учун терговчига қайтарилаётгани, бу эса конституциявий тамойилларга мос эканлигини билдирди.
Денис Кривошеев 2017 йилда қамоққа олиниб, 2018 йил суд залидан озод қилинган журналист Бобомурод Абдулланинг иши бўйича ҳукм ҳам Ўзбекистоннинг одил судлов тизимида ўзгаришлар рўй бераётгани ҳақида ўйлашга ундашини билдирди.
АҚШнинг Project Syndicate интернет нашри шу муносабат билан охирги йигирма йилда биринчи марта Ўзбекистонда панжара ортида бирор журналист қолмаганига урғу берди.
Изоҳ (0)