Инновацион ривожланиш вазирлигида Changan Automobile Group компанияси вакиллари билан учрашув бўлиб ўтди. Унда Ўзбекистон ҳудудида электромобиллар ишлаб чиқариш имкониятлари муҳокама этилди. Бу ҳақда «Дарё»га вазирлик матбуот хизмати хабар берди.
Changan компанияси вакиллари Фарғона водийсида жойлашиши мумкин бўлган электромобиллар йиғиш цехини қуриш ниятлари борлигини маълум қилди. Ўз навбатида, Инновация вазири ўринбосари Отабек Назиров мазкур лойиҳани амалга оширилишини жадаллаштириш учун бор имкониятларни ишга солиш, Ўзбекистоннинг тегишли ташкилотлари ва давлат органлари билан мулоқотга амалий ёрдам бериб, қўллаб-қувватлашга тайёр эканини билдирди. Томонлар тез кунларда ҳамкорлик тўғрисидаги меморандумни имзолашга келишиб олди.
Лойиҳа муваффақиятли ишга тушган тақдирда, биринчи босқичда 15-20 милион доллар миқдорида инвестиция киритиш, 100–150 та иш ўринлари ташкил қилиш, бир йилда мингта йирик узелли электромобиллар (Spark ва Nexia’га ўхшаш) йиғиш мумкин бўлади. Иккинчи босқичда эса республикадаги мавжуд корхоналарнинг қувватини жалб этган ҳолда ишлаб чиқариш маҳаллийлаштирилади ҳамда тўғридан-тўғри ва қўшимча иш ўринлари сони ошишига эришилади.
Таъкидлаш жоизки, Changan Automobile Group Хитой автомобиль компанияларининг «катта тўртлиги»га киради. Автокомпаниянинг Ford Motor, Suzuki Motor, Mazda Motor ва PSA Peugeot Citroen каби йирик концернлар билан қўшма корхоналари мавжуд. Changan’нинг бош идораси Чунцин шаҳрида жойлашган.
Ўзбекистонда мазкур компания гибрид двигателли ва бутунлай электр кучида ишлайдиган замонавий автомобиллар ишлаб чиқаришга урғу бериш ниятида. 2025 йилга келиб барча турдаги (кичик метражли автомобиллардан тортиб купе кузовли олий тоифадаги автомобилларгача) 21 моделдаги фақат электр қуввати билан ишлайдиган янги электромобиллар ва 12 та гибрид моделлар ишлаб чиқарилиши режалаштирилмоқда.
Изоҳ (0)