Тошкент шаҳрининг Мирзо Улуғбек туманидаги Бўз маҳалласида Жиноят ишлари бўйича Тошкент шаҳар Мирзо Улуғбек тумани суди томонидан сайёр суд мажлиси ўтказилди. Унда айбланувчи С.Р.га нисбатан қўзғатилган жиноят иши кўриб чиқилди. Бу ҳақда ЎзА хабар берди.
С.Р. 1992 йилда Қашқадарё вилоятида туғилган. Муқаддам судланиб, маълум муддат озодликни чеклаш жазоси тайинланган.
Аммо бу ҳам унинг кўзини очмади. С.Р. 2017 йил 6 май куни кеч соат 18:00 атрофида Мирзо Улуғбек туманида жойлашган Даволаш профилактика маркази палаталаридан бирига яширинча кириб, даволанаётган фуқаро М.Ч.га тегишли бўлган 1 миллион 700 минг сўм миқдоридаги пулни яширин равишда олиб, ҳодиса жойидан ғойиб бўлади. Марказда жойлаштирилган кузатув камераларида қинғир ишлари намоён бўлган жиноятчи ички ишлар ходимлари томонидан қўлга олинди.
Жиноятчи судда қилган ишидан чин кўнгилдан пушаймонлигини ва келтирилган моддий зарарни тўлиқ қоплаб берганини билдириб, енгиллик берилишни сўради.
Суд С.Р.ни Жиноят кодексининг тегишли моддаси билан айблаб, унга нисбатан 3 йил озодликни чеклаш жазоси тайинлади.
С.Р. Жиноят кодекси 59-моддасининг 8-қисмига асосан Жиноят ишлари бўйича Бухоро шаҳар судининг 2017 йил 18 сентябрдаги ҳукми билан тайинланган жазога қисман қўшиш йўли билан 3 йил-у 6 ойга озодликдан маҳрум қилинди.
Изоҳ (0)