Ўзбекистонда янги ўқув йили учун 28 миллион нусхада дарсликлар чоп этилади

6 июнь куни Халқаро пресс клубнинг «2018—2019-ўқув йили: янгиликлар, муҳим вазифалар ва муаммолар таҳлили» деб номланган навбатдаги сессияси бўлиб ўтди.

Сессияда Ўзбекистон халқ таълими вазири ўринбосари Дилшод Кенжаев, Ўзбекистон матбуот ва ахборот агентлиги бош директорининг биринчи ўринбосари Ўктам Ҳамроев, Халқ таълими вазирлиги умумий ўрта таълим вазирлиги Умумий ўрта таълим муассасаларида ўқув-методик жараёнини ривожлантириш бош бошқармаси бошлиғи Абдураҳим Носиров, 10—11-синф адабиёт дарслиги муаллифи Насрулло Қурбоновлар спикер сифатида иштирок этди.

Сессияда қайд этилишича, 2018—2019-ўқув йилида умумий ўрта таълим муассасаларининг 1,2,11-синфлари учун тўлиқ тўпламдаги дарсликлар ва ўқув-методик мажмуалар тайёрланиб, бугунги кунда чоп этиш ишлари давом этмоқда.

Жумладан, 11-синф учун 7 та тилда 20 та фандан 32 номдаги дарсликларнинг оригинал макети яратилди.

1—2-синфлар учун 76 номдаги ўқув-методик мажмуалари қайта нашрга тайёрланди. Янги ўқув йили учун жами 28 миллион нусхада дарсликлар чоп этилади.

Шу билан бирга умумий ўрта ва ўрта махсус таълимнинг дарсликлар ва ўқув-методик мажмуаларни замон талабларига мувофиқ яратиш, уларни нашрга тайёрлаш ва нашр этиш борасида айрим муаммо ва камчиликлар ҳам кузатилмоқда.

Шунинг учун ҳам ҳозирда дарсликлар ва ўқув-методик қўлланмаларни яратиш бўйича янги тартиб ишлаб чиқилмоқда, унга кўра дарсликларни бир йил давомида яратиш ҳамда кейинги йил давомида таълим муассасаларида тажриба-синовдан ўтказиш натижасида такомиллаштириб, амалиётга жорий этиш кўзда тутилмоқда.

Янги тартибга кўра дарсликларни яратиш бир йил давомида нашриётлар томонидан амалга оширилади ва амалиётчи ўқитувчилар томонидан экспертизадан ўтказилади, олинган хулоса ва таклифлар асосида тузатиш ва қўшимчалар киритилганидан сўнг яна бир йил давомида таълим муассасаларида тажриба-синовдан ўтказилади.

Тажриба-синов натижаларига кўра, амалиётга жорий этиш учун маъқул деб топилган дарслик босмахоналар томонидан чоп этилишига рухсат берилиши назарда тутилган. Дарсликларни чоп этувчи матбаа корхоналар томонидан ўқув адабиётларини сифатли ва амалдаги стандарт талабларига мувофиқ чоп этилиши таъминланади.