Самарқандда банк ходими фирибгарликка қўл урди

«Микрокредитбанк» АТБ Булунғур филиали кредитлаш бўлими бошлиғи, бошқарувчи ўринбосари вазифасида ишлаб келган Баҳром Мелиқулов кредит ҳужжатларини сохталаштириб, маблағларни ўзлаштирди.

Баҳром Мелиқулов Булунғур иқтисодиёт ва сервис касб-ҳунар коллежи ўқитувчиси Ф.Жиянмуродовнинг имтиёзли шартларда кредит олиш истагини билиб, 2016 йилда коллеж битирувчиларининг рўйхати, кредит олишни сўраб ёзган аризаларини олади.

Ҳужжатларни банк кредит бўлими кўриб чиқиш жараёнида фуқаро М.Ҳатамованинг кредит олиш истагидан воз кечгани ва банкка келмаганидан фойдаланиб, унинг номига ажратилган 6 миллион 500 минг сўмни ўзлаштириб олади ва сохта ҳужжатлар билан «Фозил Гаппарович даласи» фермер хўжалигининг ҳисоб рақамига кўчириб берилишига эришади. Эвазига олинган 1,5 минг килограмм картошка уруғини ишлатиб юборади.

34 яшар Б. Мелиқулов «Небўса» МФЙ, «Қуриқозон» қишлоғида яшаб келган. Бир неча йил давомида «Микрокредитбанк» АТБ Булунғур филиалининг кредитлаш бўлими ходими сифатида ишлаган. Булунғур иқтисодиёт ва сервис касб-ҳунар коллежи битирувчиси М.Ҳатамованинг кредит ҳужжатлари кўриб чиқилаётган вақтда банкка келмаган ва кредитда воз кечганига қарамай, унга кредит маблағи ажратиш мақсадга мувофиқлигини муҳокамага киритган.

Битирувчи М.Ҳатамова картошка уруғи сотиб олиш учун кредит ҳужжатларини тўғрилашда 51-умумий ўрта таълим мактаби ўқитувчиси Қувондиқ Алимовнинг кафиллик ҳужжатларини ҳам топширган эди. Б.Мелиқулов мансаб мавқеини суиистеъмол қилиб сохтакорлик жиноятига қўл урди.

Судланувчининг ғаразли ниятдаги қилмиши оғирлаштирувчи ҳолатга сабаб бўлиши инобатга олиниб, суд ҳукми билан мансабдорлик вазифасида ишлаш ҳуқуқидан маҳрум қилинди ва уч йил муддатга аҳлоқ тузатиш жазоси тайинланди.

Б.Мелиқулов етказилган зарар ўрнини тўлиқ қоплади.