«Менинг фикрим» жамоавий мурожаатлар порталида фонограммадан фойдаланган ҳолда концерт берганлик учун қўшимча 30 фоиз солиқ жорий этиш ҳақидаги таклиф жойлаштирилди.
«Фонограмма орқали концерт берувчилар концертда жонли ижро эта олмаганлиги сабабли унда рақслар ва безаклар билан томошабин эътиборини тортишга уринмоқда. Бу нарса одамларда, айниқса ёшларда асл санъатдан узоқлашишга ва маънавий бўшлиқ юзага келишига сабаб бўлмоқда», — дейилади мурожаат матнида.
Муаллиф гастрол-концерт фаолияти билан шуғулланишга лицензияси бўлган юридик ва жисмоний шахслардан (шу жумладан, норезидентлар), уларнижалб этиб, оммавий тадбирларини ташкил этишдан фойда кўрадиган юридик шахсларнинг даромадидан қўшимча 30 фоиз солиқ олиш тартибини жорий қилишни таклиф этган.
Ҳозирча 392 та овоз тўплаган мазкур таклифга талай изоҳлар қолдирилган. Улардан бирида солиқ миқдорини 50 фоиздан 70 фоизгача белгилаш лозимлиги кўрсатилган бўлса, яна бирида фонограмма ишлатадиган санъаткорларнинг «Халқ артисти» ва «Хизмат кўрсатган артист» унвонларини бекор қилиш ҳақидаги фикр илгари сурилган.
Изоҳ (0)