«Ўзбекистон ҳаво йўллари» стюардессалари Москвада бўлиб ўтган халқаро танловда икки номинация бўйича ғолиб дея топилди, деб хабар беради Sputnik.
Sky Service-2018 профессионаллар конкурсида ўзбекистонлик стюардессалар «Йил жамоаси» ва «Йилнинг энг яхши стюардессаси» номинациялари бўйича ғолиб бўлишди.
«Ўзбекистон ҳаво йўллари» жамоаси таркибида стюардессалар Дилноза Абдуллаева ва Наталя Ким, уларнинг бригадирлари Вилена Роднова ва Раъно Бабабекова иштирок этишди. Гуруҳ раҳбари ўтган йилги танловда олтин медаль соҳиби бўлган Элвина Кайбулаева.
МАК жамоаси форум иштирокчиларига Ўзбекистондан олиб келинган сувенирлар ва Самарқанд нонини улашишди.
Sky Service – ҳаво транспорти соҳасида хизмат кўрсатувчи профессионалларнинг нуфузли форуми бўлиб, бу сафар унда Россия ва хориждан келган 40 дан ортиқ авиакомпаниялар, 50 дан ортиқ овқат тайёрлаш ва бошқа хизматларга ихтисослашган корхоналар иштирок этишди.
Форум доирасида, шунингдек, стуюардессалар учун «Самолёт бортида савдо хизмати» мавзусида ўқув дастури ҳам бўлиб ўтди.
Изоҳ (0)