Ингушетия муфтийлиги республика раҳбари Юнусбек Евкуровни мусулмон жамоатидан четлатди, деб хабар беради Meduza.
Мазкур қарор оқсоқолларнинг 27 май куни бўлиб ўтган йиғилишида қабул қилинган бўлиб, унга кўра мусулмонларга Ингушетия раҳбарига боғлиқ тўйлар, дафн маросимлари ва бошқа шу турдаги тадбирларда иштирок этмаслик буюрилади.
Евкуров диний марказга нисбатан дискриминацияси сабаб четлатилгани айтилмоқда.
Ингушетия мусулмонлари диний Маркази баёнотида ёзилишича, ҳукумат томонидан муфтийликка нисбатан уч йилдан буён зулм ўтказиб келинмоқда. Евкуровнинг четлатилишига, суд томонидан Магасдаги масжид қурилаётган ернинг тортиб олиниши сабаб бўлган.
Ингушетия муфтийсининг ёрдамчиси Муҳаммад Хаштировнинг айтишича, диний идора бутун бошли ҳукуматга эмас, айнан бир нафар амалдорнинг хатти-ҳаракатларига қарши чиқмоқда.
«Жамоатчиликдан ажратиб қўйиш амалиётини биз ўйлаб топмаганмиз. Бу ҳақда бутун дунё билади ва азалдан амал қилиб келади… Руҳий соғлом инсонга бу жуда кучли зарба ҳисобланади. Жамоатчилик у билан ҳеч қандай алоқа ўрнатишни истамайди. Биз унинг азасига, тўйи-ю маракаси каби бошқа тадбирларига бормаймиз. Бу жамоатчилик орқали босим ўтказиш чорасидир», — дейди Хаштиров.
Изоҳ (0)