Австриянинг FH Krems амалий фанлар университети бош ижрочи директори Карл Энсфелнер, президенти Маг Боер Хейнс ҳамда трансмиллий дастурлар бўйича директори Женс Питер Эннендан иборат делегация Тошкентда Инновация вазири Иброҳим Абдураҳмонов билан учрашди. Бу ҳақда «Дарё»га вазирлик матбуот хизмати маълум қилди.
Карл Энсфелнер ўзи раҳбарлик қилаётган олий таълим муассасасида 2700 нафар талаба бизнес, тиббиёт ва табиий фанлар бўйича таълим олаётгани ҳақида айтиб ўтаркан, университет битирувчиларининг ишга жойлашиш даражаси 98,5 фоиз эканлигига алоҳида урғу берди. Шунингдек, университетда кўплаб илмий-тадқиқот дастурлари ҳам ишлаб чиқилиб, улар саноатга жорий этилган. Университетнинг туризм йўналишидаги ўқув дастурини Ўзбекистонда жорий қилиш мумкинлиги қайд этилди.
Профессор Энсфелнер Ўзбекистон туризмининг имкониятлари кенглилиги, бироқ мазкур соҳани ривожлантириш учун кадрлар ва билимлар етарли эмаслигини билдирди. Сайёҳларни жалб қилиш учун туризм инфратузилмасини ривожлантиришга қодир ва мойил мутахассисларни етиштириш лозимлигини таъкидлади. Бу йўналиш бўйича шу пайтгача Озарбайжон, Хитой ва Вьетнамдаги ижобий ҳамкорлик натижалари Ўзбекистонда ҳам ўз самарасини беришига умид боғланаётгани айтилди.
Инновация вазири бугунги кунда Ўзбекистонда биологик фаол моддалар тадқиқоти бўйича қатор изланишлар олиб борилаётгани, аммо улар тегишли тарзда синовлардан ўтказилмаганини айтди. Инновацион ишланмалар ишончли бўлиши ва хорижий ҳамкорлар томонидан қабул қилиниши учун Ўзбекистонга GLP (Good Laboratory Practice—Мақбул лаборатор амалиёт) стандартини жорий этиш зарурияти ҳақида гапирди.
Вазирнинг бу фикри делегация аъзоларида қизиқиш уйғотиб, лаборатория тадқиқотлари натижаларини мувофиқлаштирувчи ва аниқлигини таъминловчи меъёрлар, қоидалар ва кўрсатмаларнинг ушбу тизимини Ўзбекистонда қўллаш бўйича ҳамкорликни йўлга қўйиш имконияти мавжудлигини айтди.
Суҳбат якунида Иброҳим Абдураҳмонов Инновацион ривожланиш вазирлиги FH Krems амалий фанлар университетинивазирлик томонидан октябр ойида ўтказилиши режалаштирилаётган InnoWeek.uz халқаро кўргазмасига таклиф қилди.
Изоҳ (0)