Тошкент шаҳридаги Инҳа университети абитуриентлардан ҳужжат қабул қилишни бошлади

Тошкент шаҳридаги Инҳа университети (IUT) 2018/2019-ўқув йили учун абитуриентлардан ҳужжат қабул қилишни бошлади.

Аввалги йиллардаги каби бу йил ҳам олий ўқув юртига ҳужжат қабул қилиш тўлиқ онлайн тартибида амалга оширилади. Рўйхатдан ўтиш 9 июль куни соат 17:00 гача давом этади.

Абитуриентларга бўлган талаблар ўзгаришсиз қолди. Улар IELTS ёки TOEFL iBT сертификатини тақдим этган ҳолда инглиз тилидан билим даражасини тасдиқлаши керак. Инглиз тилидан сертификат ва бошқа тегишли барча ҳужжатларни тақдим этган абитуриентларгина имтиҳонларга киритилади.

2018/2019-ўқув йили учун университет камида 420 нафар талабани қабул қилади. Жумладан, «Компьютер ва дастурий инжиниринг» йўналиши бўйича 300 нафар ва «Логистика» йўналиши бўйича 120 нафар.

«Компьютер ва дастурий инжиниринг» йўналишига имтиҳонлар 19 июль, «Логистика» йўналиши бўйича 20 июль куни бўлиб ўтади. Биринчи йўналиши бўйича тўлов-шартнома нархи 28,5 миллион, иккинчи йўналиш бўйича 30 миллион сўмни ташкил этади.