«Менинг фикрим» жамоавий мурожаатлар порталига жойлаштирилган автомобилнинг орқа ойналарини қорайтиришга рухсат бериш таклиф этилган петиция 9400 дан ортиқ овоз тўплади. Бу ҳақда Sputnik хабар бермоқда.
Петиция муаллифи Артур Тажиев буни Ўзбекистон иқлими иссиқ эканлиги, пардалар ҳам тақиқлангани сабабли орқа ўриндаги болалар жазирама ва офтоб уришидан азият чекиши мумкинлиги билан изоҳлаганди. Шунингдек, давлат бюджетига тушумларни кўпайтириш учун автомобиль олди ойнасини пулли асосда 70 фоиз қорайтиришга рухсат бериш, бундай машиналарни ички ишлар органларида рўйхатга қўйишни таклиф этганди.
Ушбу таклифга қаршиларнинг ҳам, ёқлаганларнинг ҳам изоҳларини кўриш мумкин.
«Юртимиз серқуёш ўлка бўлганлиги учун бизга керак. Хавфли деган фикрлардан жуда узоқдаман, сабаби ривожланган давлатларга назар солсак, деярли барча давлатларда рухсат бор ва текин», деб ёзади Муҳаммадюсуф Самиев.
«Ойналарни қорайтиришга умуман рухсат бериш керак эмас. Бу ортиқча ташвиш ва муаммоларни келтириб чиқаради. Иқлим иссиқ бўлгани билан ойна қорайтирилиши автомашина салонини совутмайди. Уни кондиционер совутади. Кондиционер деярли ҳаммада бор», дейди Ўткир Аслонов.
Петиция 10 мингта овоз тўпласа, Олий Мажлис муҳокамасига ўтказилади.
Изоҳ (0)