Тошкентдаги Ёшлар ижод саройида 30 май — 1 июнь кунлари «Болажонлар-ширинтойлар» республика болалар мода фестивали намойиши бўлиб ўтади. Бу ҳақда тадбир ташкилотчиларидан бири — «Осиё рамзи» дизайнерлар уюшмаси «Дарё»га маълум қилди.
Фестивалнинг январь ойида бўлиб ўтган биринчи босқичида 100 га яқин дизайнерларнинг модель эскизлари ва коллекция учун матолари тасдиқланган эди. Иккинчи босқичда эса иштирокчилар коллекциянинг якуний концепцияларини тақдим этди. Босқич якунларига кўра, 30 нафар дизайнер кейинги босқичга йўл олди.
11 май куни фестивалнинг якуний саралаш босқичи бўлиб ўтди. Унда 2 ёшдан 13 ёшгача бўлган болалар учун мўлжалланган, турли йўналишдаги 21 коллекция саралаб олинди. Ўзбекистоннинг етакчи дизайнерлари томонидан ишлаб чиқилган коллекцияларни 2 ёшдан 13 ёшгача бўлган оралиқдаги 150 га яқин ёш манекен болалар ва қизлар намойиш этиб берди.
30 майдан 1 июнга қадар фестивалнинг якуний шоу-намойиши бўлиб ўтади, унда нафақат либослар тақдимоти, балки ўзбек эстрада юлдузлари иштирокидаги томошалар ташкил этилиши ҳам кўзда тутилган.
Маълумот учун, «Болажонлар-ширинтойлар» болалар мода фестивали Ўзбекистонда 2000 йилдан бери ўтказиб келингади.
Изоҳ (0)