«Тошкент» халқаро аэропортида йўловчилардан бири тилла қуймаларни яширинча олиб чиқишнинг навбатдаги усулини «кашф» қилди. Бу ҳақда Божхона қўмитаси ахборот хизмати хабар берди.
Деҳлига парвози олдидан фуқаро Н.Ш. божхона чегарасидан яшил йўлак орқали ўтди. Лекин у божхона ходимларининг кўзини шамғалат қилишга уриниб, пояфзалларининг остки қисмига 79 грамм оғирликдаги тилла қуймаларни яширган экан.
Қонунбузар шу билан кифояланмаган. Унга тегишли багаж ҳам синчиклаб кўздан кечирилганда, юклар орасидаги планшетнинг назорат-рентген аппаратидаги тасвирлари шубҳали акс этди.
Шундан сўнг ушбу планшет холислар иштирокида кўздан кечирилганида, унинг орасига ҳам жуда юпқа қилиб ишланган 215,8 грамм оғирликдаги қуйма тиллалар яширилганлиги аниқланди.
Ҳозирда ушбу ҳолат юзасидан божхона текширувлари олиб борилмоқда.
Изоҳ (0)