Андижон вилоятида ташриф билан бўлиб турган Ўзбекистон Президенти Шавкат Мирзиёев ҳудудда 2018—2019 йилларда аграр соҳани ривожлантиришга қаратилган дастур ва лойиҳалар тақдимоти билан танишди. Бу ҳақда Президент матбуот хизмати хабар бермоқда.
Президент 2017 йили Ўрмон хўжалиги илмий-тадқиқот институтининг Андижон филиалини ташкил этиш бўйича топшириқ берган эди. Ҳозирги кунда мазкур филиал ташкил этилган, илмий ходимлар томонидан вилоятда ўрмон хўжалигини ривожлантириш бўйича қатор истиқболли лойиҳалар ишлаб чиқилган.
«2016 йилда ўрмон ерларида бор-йўғи 8 гектарда қишлоқ хўжалиги маҳсулотлари етиштирилган бўлса, жорий ва келгуси йилда бу кўлам 830 гектарга етказилади. Адир ва тоғолди ҳудудларида кўплаб доимий ва мавсумий иш ўринлари яратилади», — дейилади Президент матбуот хизмати ахборотида.Шавкат Мирзиёев ўрмон хўжалигида инновацион ғояларни қўллаш, экинлар тури ва ҳосилини кўпайтириш бўйича махсус жамғарма тузиш зарурлигини таъкидлади.
Вилоятда балиқчиликни ривожлантириш масаласига ҳам эътибор қаратилди. Жорий йилда 11 туманда янги ҳовузлар барпо этиш, аҳоли томорқалари ҳамда шоли майдонида Хитой ва Ветнам технологияси асосида балиқ етиштириш режалаштирилгани қайд этилди.
Шу ерда паррандачилик, чорвачилик, ёнғоқчиликни кенгайтириш, мева-сабзавотларни экспорт қилишга оид лойиҳалар тақдимоти ўтказилди. Шавкат Мирзиёев тадбиркорлар ва мутасаддиларга зарур кўрсатмалар берди.
Изоҳ (0)