Ўзбекистон Президенти Шавкат Мирзиёев Андижон вилоятига ташрифи доирасида 19 май куни Асака туманидаги гидропоника усулида банан ва помидор етиштирувчи иссиқхоналарни бориб кўрди. Бу ҳақда Президент матбуот хизмати хабар бермоқда.
Қайд этишларича, Шавкат Мирзиёев 2017 йил 2 июнида Андижон вилоятида бўлганида унга Асака туманида замонавий иссиқхона қуриш лойиҳаси тақдим этилган эди.
«Тадбиркор ташаббуси ва давлат кўмаги натижасида ушбу лойиҳа қисқа даврда рўёбга чиқди. ‘Сабо ҳамкор’ компанияси томонидан гидропоника усулида банан ва помидор етиштирилувчи иссиқхоналар бунёд этилди. Туркиянинг Ася Модерн Серачилик компанияси билан тузилган шартномага асосан инновацион ускуналар олиб келинди», — дейилади хабарда.
Шавкат Мирзиёев мазкур иссиқхоналарга ташрифи давомида компьютер орқали бошқариладиган совутиш ва суғориш тизими билан танишди.
Қайд этишларича, ҳозирги вақтда 2 гектарлик иссиқхонада банан кўчатлари парваришланмоқда. Биринчи мавсумда бу мевадан 250-300 тонна ҳосил олиш кутилмоқда.
Помидор кўчатлари экилган 1 гектарлик иссиқхонадан жорий йилда 300 тонна ҳосил олиш ва қўшни давлатларга экспорт қилиш мўлжалланмоқда. Корхонада 40 дан ортиқ доимий иш ўрни яратилган.
«Жамият томонидан келгусида ушбу замонавий иссиқхона мажмуасини кенгайтириш, маҳсулотни қайта ишлаш ва сақлаш шароитини яратиш режалаштирилмоқда», — дейилади Президент матбуот хизмати ахборотида.
Изоҳ (0)