Тожикистон чегарачилари Қирғизистоннинг Лайлак туманидаги Сад қишлоғида жанжал келтириб чиқарди. Бу ҳақда «SNG Today» хабар берди.
Хабар берилишича, 12 май куни Тожикистон чегара хизматининг тўрт нафар ҳарбий хизматчиси транспорт воситасида Қирғизистондаги аҳоли пунктига келган, кейин эса қўшни давлат фуқароларининг ҳужжатларини текширишга ҳаракат қилган.
Бундай ҳаракатлар қишлоқ аҳолисининг норозилигига сабаб бўлган ва икки томон ўртасида дастлаб оғзаки тортишув келиб чиққан. Кейинроқ юз берган кичик тўқнашув натижасида қишлоқ аҳолиси ҳарбийларнинг транспорт воситасини эгаллаб олган. Қишлоққа маҳаллий ҳуқуқни муҳофаза қилиш органлари, шунингдек, Қирғизистон чегара хизмати вакилларининг етиб келиши жанжални бартараф қилишга имкон берган.
Мазкур ҳодиса икки давлат чегара хизматлари раҳбарлари учрашуви доирасида кўриб чиқилган. Тожикистон томони расман узр сўраган ва ҳодисани чегарачиларнинг тажрибасизлиги сабабли қўшни мамлакат ҳудудига ўтиб кетгани билан изоҳлаган.
Изоҳ (0)