Бокс. Нокдаунга учраган Василий Ломаченко рақибини нокаут билан енгиб, чемпион бўлди ва рекорд қўйди (видео)

13 май тонгида украиналик жаҳон чемпиони Василий Ломаченко ҳамда яна бир жаҳон чемпиони Хорхе Линарес чемпионлик жангида рингга кўтарилди, деб ёзади «Оламспорт».

Боксчилар 61,2 кг вазн тоифасида жанг ўтказди. Ўн икки раундга мўлжалланган жанг ўнинчи раундда Ломаченконинг ғалабаси билан тугади. Олтинчи раундда нокдаун ҳолатига тушиб қолган украиналик чемпион вазиятни ижобий томонга ўнглай олди. Ўнинчи раундда зарбалар сериясини ўтказиб юборган Линарес рефери ҳисобни якунига етказганида ҳам ўрнидан кўтарила олмади.

Шу тариқа иккинчи ярим енгил вазн тоифасида WBO йўналиши чемпиони ҳисобланган Ломаченко Линаресга тегишли енгил вазндаги WBA Супер чемпионлик камарини ўзиники қилиб олди.

Уч йил аввал япониялик Кадзуто Иока учта турли вазн тоифаларида жаҳон чемпионлигига эришганди. Бунинг учун унга 18 та жанг керак бўлган. Ломаченко эса бугун ушбу рекордни янгилади. Линаресга қарши кечган жанг унинг профессионал бокс фаолиятидаги 12-жангга айланди. Бу билан у учта вазн тоифасида жаҳон чемпионлигига эришиб, рекорд ўрнатди.