Бугун, 7 май куни Осиё регби иттифоқи раҳбари Ага Ҳусайн Ўзбекистон Миллий олимпия қўмитасига ташриф буюрди. Бу ҳақда қўмита ахборот хизмати маълум қилди.
Меҳмонни қўмита бош котиби Жасур Матчанов кутиб олди. Учрашувда регби спорт турининг Ўзбекистондаги тараққиёти, ҳамкорликни янада мустаҳкамлаш, федерация учун база, ташкилий ва бошқа масалалар ҳусусида сўз борди.
«Қабул учун миннатдорчилик билдираман. Ўзбекистон регби ривожланаётган мамлакатлар қаторига киради. Ишонаманки, яқин йиллар ичида юртингизда регби спорт тури янада оммавийлашади», – деди Ага Ҳусайн.
Суҳбат давомида Тошкентда Марказий Осиё регби маркази очилиши ва бу ғоя Осиё регби иттифоқи томонидан қўллаб-қувватланиши маълум қилинди.
Учрашув якунида мартабали меҳмонга Миллий олимпия қўмитаси номидан эсдалик совғалари тақдим этилди.
Изоҳ (0)