Туркия президенти Ражаб Тоййиб Эрдўғоннинг Ўзбекистонга ташрифи доирасида икки мамлакат адлия вазирликлари ўртасида ҳамкорлик тўғрисида меморандум имзоланди. Бу ҳақда Адлия вазирлиги жамоатчилик билан алоқалар бўлими «Дарё»га хабар берди.
Меморандумдан кўзланган мақсад халқаро ҳуқуқнинг умумэътироф этилган тамойил ва меъёрларига мувофиқ ҳуқуқий соҳадаги ҳамкорликни ривожлантириш, шунингдек икки томонлама ўзаро манфаатли ҳамкорлик ўрнатиш ва тажриба алмашишдан иборат.
Меморандумга асосан ҳамкорлик инсон ҳуқуқлари ва эркинликларини ҳимоя қилиш, норма ижодкорлиги, юридик хизматлар кўрсатиш, юридик кадрларни тайёрлаш ва малакасини ошириш каби соҳалар, шунингдек ўзаро манфаатли бошқа йўналишлар амалга оширилади.
Шу билан бирга, меморандумда анжуман, семинар, маъруза ва амалий машғулотлар ўтказиш, қонунчилик ва бошқа норматив-ҳуқуқий ҳужжатларни тайёрлаш амалиёти ҳамда юридик адабиёт ва бошқа нашрлар, томонлар адлия органлари ва муассасалари фаолиятини ташкил қилиш билан янада тўлиқроқ танишиш, ҳамкорликдаги тадқиқотларни ташкил қилиш ва ўтказиш, томонлар томонидан келишиб олинган бошқа чора-тадбирларни амалга ошириш мақсадида делегациялар алмашинуви кўзда тутилган.
Бундан ташқари, меморандум икки томонлама муносабатларни мустаҳкамлаш, икки давлат Адлия вазирликлари ўртасида хуқуқий соҳада самарали ҳамкорликнинг ҳуқуқий асосини яратишга хизмат қилади.
Изоҳ (0)