2017 йилда 20 мингдан зиёд ногиронлиги бўлган шахсга реабилитация хизмати кўрсатилди
2 май куни Соғлиқни сақлаш вазирлигида Ўзбекистон Президентининг 2017 йил 1 декабрда қабул қилинган «Ногиронлиги бўлган шахсларни давлат томонидан қўллаб- қувватлаш тизимини тубдан такомиллаштириш чора-тадбирлари тўғрисида»ги фармони мақсади ва моҳиятини ўрганишга бағишланган конференция бўлиб ўтди. Бу ҳақда вазирлик ахборот хизмати хабар бермоқда.
Президент фармонида ногиронлиги бўлган шахсларни қўллаб-қувватлаш тизимини янада такомиллаштириш ҳамда уларнинг ҳуқуқ ва эркинликларини ҳимоя қилиш кафолатларини кучайтириш бўйича комплекс чора-тадбирлар қамраб олинган.
Бу борада белгиланган чора-тадбирлар изчиллик билан ҳаётга татбиқ этилиши натижасида фақатгина 2017 йилнинг ўзида аҳолининг эҳтиёжманд қатламларидан 100 минг нафар фуқароларга турли хилдаги ижтимоий хизматлар кўрсатилди. Тиббий-ижтимоий муассасаларнинг моддий-техника базаси мустаҳкамланди. Ўзгалар парваришига муҳтож ёлғиз кексалар, пенсионер ва ногиронлиги бўлган 15 минг нафар шахсларга уйларида ижтимоий хизмат кўрсатиш ишлари амалга оширилди. 19,5 минг нафар эҳтиёжманд фуқаролар реабилитация техник воситалари ва протез-ортопедия маҳсулотлари билан таъминланди. Ногиронлиги бор шахслар бемалол ҳаракатланиши учун бино ва иншоотларда пандус ва тутқичлар ўрнатилмоқда. Шунингдек, 35 минг нафар пенсионер ва ногиронлиги бўлган шахслар санаторияларга юборилди. 20 минг нафардан зиёд ногиронлиги бўлган шахсларга реабилитация хизматлари кўрсатилди.
Маълумки, 1941—1945 йиллардаги уруш қатнашчиларига ўз соғлиғини тиклаш учун ҳар йили санаторияга бепул йўлланма берилади. Агар улардан бирортаси ушбу имкониятдан фойдаланмаса, ушбу фахрийларга йўлланманинг пулини тўлаш жорий қилинди. Бундан мақсад, нуронийларнинг тиббий-ижтимоий ҳимоясини кучайтиришдир.
Вазирлар Маҳкамасининг 2018 йил 9 мартдаги қарори асосида Соғлиқни сақлаш вазирлиги ҳузуридаги ногиронлиги бўлган шахсларни қўллаб-қувватлаш жамғармаси ташкил этилиши жамиятда амалга оширилаётган ижтимоий ҳимоя тадбирлари самарадорлигини янада юксалтиришда муҳим омил бўлиб хизмат қилмоқда. Ушбу жамғарма маблағлари ногиронлиги бўлган шахсларга кўмак бериш, инклюзив таълимни ривожлантириш, реабилитация сифатини ошириш ва бошқа тиббий-ижтимоий лойиҳаларга йўналтирилади.
