Пўлат Бобожонов туркиялик ҳамкасби билан жиноятчиликка қарши кураш бўйича ҳамкорликни кучайтириш ҳақида келишиб олди

Туркия президенти Ражаб Тоййиб Эрдўғон бошчилигидаги делегациянинг Ўзбекистонга ташрифи доирасида икки мамлакат ички ишлар вазирлари томонидан бир қатор халқаро шартномалар имзоланди. Бу ҳақда ИИВ жамоатчилик ва ОАВ билан алоқалар бошқармаси хабар бермоқда.

Жумладан, «Ўзбекистон Республикаси ва Туркия Республикаси ўртасида жиноятчиликка қарши курашишда ҳамкорлик қилиш тўғрисида битим», «Ўзбекистон Республикаси ҳукумати ва Туркия Республикаси ҳукумати ўртасида ҳуқуқни муҳофаза қилиш соҳасида ўқитиш бўйича ҳамкорлик тўғрисида протокол» имзоланди.

Ташриф давомида Ўзбекистон Ички ишлар вазири Пўлат Бобожонов ва Туркия Ички ишлар вазири Сулаймон Сўйлу ўртасида музокаралар ўтказилди. Унда жиноятчиликка қарши кураш бўйича икки томонлама ҳамкорликни кенгайтириш, терроризм ва халқаро жиноятларга қарши курашиш, шунингдек, бу каби жиноятларни олдини олишда ўзаро ҳамкорлик муҳимлиги билдирилди.

Шунингдек, вазирлар икки мамлакат муносабатларини яхшилаш, ҳамкорлик салоҳиятини янада юқорига кўтариш мақсадида вазирликлараро Мувофиқлаштирувчи ишчи гуруҳ тузиш масаласини муҳокама қилди.

Туркия Ички ишлар вазирлиги делегацияси Тошкент шаҳрининг диққатга сазовор жойлари билан танишди.