Тулуза шаҳрида жойлашган Француз Миллий политехника институти самолётда учишдан қўрқадиганлар учун махсус мослама яратди. Бу ҳақда Ouest France газетасига таяниб, «ТАСС» хабар берди.
Парвозлардан қўрқадиган кишилар учун яратилган қурилма ташқи кўринишидан микрофонли наушникларни эслатади.
Ишлаб чиқарувчилар мусиқа ва ёқимли ҳидларнинг одамга тинчлантирувчи таъсир кўрсатишини эътиборга олган. Шунинг учун улар одатий микрофонли наушникларнинг кўринишини андоза қилиб олган. Бироқ аслида ҳеч қандай микрофон йўқ – мосламанинг бу қисми ёқимли, тинчлантирувчи ифорларни таратишга хизмат қилади.
Бундай ечим танланганининг сабаби шундан иборатки, агар ҳидли моддалар бутун самолёт бўйлаб таратилса, уларга аллергияси бор кишилар топилиши мумкин. Қурилманинг бу қисмини яратишда ишлаб чиқарувчилар яна бир қийинчиликка дуч келган: ҳид таратувчи моддаларнинг барчаси юқори конснтрацияга эга бўлиб, бу ҳолатда уларни одамнинг юзига яқин келтириб бўлмайди. Шунинг учун бу моддалар замонавий принтер ёрдамида ингичка толалар ҳолига келтирилади. Толалар шиша найча ичига жойланиб, йўловчи ўриндиғининг қўллар қўйиладиган жойига ўрнатилади. Наушниклар кўринишидан оддийдек кўринса-да, аслида ичига махсус симлар ўрнатилган бўлиб, улар орқали ўтган мини-вентилятор ўзидан ифор таратади.
Ялпиз, мойчечак ёки апельсин дарахти ҳидларидан биттасини танлаш мумкин. Мосламанинг ифор таратувчи қисми гигиена нуқтайи назаридан ҳар парвоз олдидан янгиланади.
Мослама, авваламбор, йўловчи қўрқув ҳис қиладиган пайтлар – самолётнинг ҳавога кўтарилиш ва қўниш вақтида фойдаланишга мўлжалланган. 10 дақиқа олдин ёқиш тавсия қилинади.
Аэрофобия, яъни парвоздан қўрқиш касаллиги биз ўйлаганимиздан анча кенг тарқалган. Ҳаво транспорти халқаро ассоциацияси маълумотларига қараганда, бу касалликдан жами авиайўловчиларнинг 20 фоизи азият чекади (буларнинг тўртдан уч қисми – эркаклар). Шунинг учун француз ишлаб чиқарувчилари яратган бу ихтиронинг келажаги бор, дейиш мумкин. Мосламанинг тахминий нархи – 50 евро.
Ихтиронинг расмий тақдимоти июль ойида Тулузада бўлиб ўтади, негаки айнан ўша ерда фан, инновациялар ва уларнинг жамоатчилик ҳаётига таъсирига бағишланган халқаро форум (Euro Science Open Forum) бўлиб ўтади. Яқин келажакда қурилма тинчлантирувчи тасвирлар узатувчи виртуал реаллик кўзойнаклари билан тўлдирилиш эҳтимоллари мавжуд. Ишлаб чиқарувчилар ихтирони биринчи бўлиб Airbus концернига тақдим қилиши кутилмоқда.
Ихтиро C2AO деб номланди («наушник» (casque), «аэро», «аудио» и «хушбўй» сўзларининг биринчи ҳарфларидан олинган). Қурилмани ишлаб чиқариш 2 йилдан сўнг йўлга қўйилиши кутилмоқда. Тулуза политехника институти ҳар йили камида 10 та ихтиро тақдим этади ва мижозлар билан 450 га яқин шартнома имзолайди.
Изоҳ (0)