Хорижда ишлаб чиқарилган, аммо божхона расмийлаштирувидан ўтганлиги ва сифатини тасдиқловчи ҳужжатлари бўлмаган пиво ичимликлари нафақат ички бозордаги рақобат муҳитига, шунингдек фуқаролар саломатлигига ҳам салбий таъсир ўтказиши мумкин, деб хабар беради Давлат божхона қўмитаси матбуот хизмати.
Маълумки, Ўзбекистон Республикаси Президентининг 2018 йил 6 февралдаги «Жисмоний шахслар томонидан божхона чегараси орқали товарларни олиб ўтишни янада тартибга солиш чора-тадбирлари тўғрисида»ги қарори билан жисмоний шахсларга қўшни давлатлардан пиёда ёки автомобилда кириб келиш чоғида 300 АҚШ долларигача бўлган қийматдаги товарларни божсиз олиб киришга рухсат этилди.
Бунда айрим товарлар учун эса қатъий меъёрлар ўрнатилди. Хусусан, жисмоний шахслар мамлакатга алкоголь маҳсулотлари, шу жумладан пиводан 2 литргача олиб киришлари мумкин. Лекин, сўнгги вақтларда айрим фуқаролар томонидан ушбу меъёрларга риоя қилмасдан, пиво ичимликларини Ўзбекистонга ташмачилар кўмагида кўп миқдорда олиб ўтишга уринишлар кўзга ташланмоқда.
Хусусан, Тошкент вилояти божхона бошқармаси Контрабандага қарши курашиш бўлими ходимлари томонидан «Ғишткўприк» чегара-божхона комплекси атрофида ўтказилган тезкор тадбир давомида шу ҳудудда ҳаракатланаётган фуқаро Л.Н қиймати салкам 1,6 миллион сўмлик 106 дона жами 53 литр пиво ичимликларини олиб кетаётган вақтда тўхтатиб қолинди.
Шу ҳудудда ўтказилган яна бир тезкор тадбир давомида фуқаро Қ.Ш ҳам ноқонуий олиб кетаётган қиймати салкам 2,6 миллин сўмлик 4 турдаги 84 дона жами 73 литрдан ортиқ пиво ичимликларига тегишли биронта ҳам ҳужжатни божхоначиларга тақдим қила олмади.
Шу каби қонунбузарлардан яна бири М.Х эса қиймати 2,7 миллион сўмдан, ҳажми 78 литрдан ортиқ 3 турдаги 114 дона пиволарни олиб кетаётган вақтда тўхтатиб қолинди.
Ҳозирда мазкур ҳолатлар юзасидан божхона текширувлари ва суриштирув жараёнлари давом эттирилмоқда. Таъкидлаш жоизки, 2017 йил давомида ва 2018 йилнинг ўтган даври мобайнида Тошкент вилояти божхона бошқармаси ходимлари томонидан ҳуқуқни муҳофаза қилувчи идоралар вакиллари билан ҳамкорликда аниқланган 79 та божхона қоидабузарликлари натижасида қиймати 208 миллион сўмдан ортиқ бўлган салкам 10 минг литр спирт ва алкоголли ичимликларнинг ноқонуний олиб ўтилишига чек қўйилган.
Изоҳ (0)