Тошкент вилояти ҳокими Бўзсув канали ҳақидаги мақоладан сўнг видеоселектор йиғилишини ўтказди

«Халқ сўзи» газетаси томонидан жорий йилнинг 19 апрелдаги сонида «Сувнинг уволи ёмон» сарлавҳали мақола эълон қилинган бўлиб, унда Тошкент шаҳри ва вилоятининг бир қисмини тоза ичимлик суви билан таъминловчи Бўзсув канали ҳақида  сўз борган. Мазкур таҳлилий мақолада кўтарилган масалалар пойтахт вилояти ҳокимлигининг алоҳида назоратига олинди, деб хабар беради «Халқ сўзи».

Ўтган ҳафта вилоят ҳокими раислигида шошилинч чақирилган видеоселектор йиғилиши ушбу мақола муҳокамасига бағишланди.

Вилоят ҳокими Ғуломжон Ибрагимов газетанинг ушбу танқидий-таҳлилий чиқиши ғоят ўринли бўлганини таъкидлаб, шу кунга қадар барча мутасаддилар Бўзсув канали билан боғлиқ аҳволни кўра-била туриб, «Сен менга тегма, мен сенга тегмайман» қабилида кўз юмиб келганларини афсус билан қайд этди. Вилоят ҳокими анҳор муҳофаза зонасидаги ноқонуний қурилмалар, оқова сувлари ҳамда маиший чиқиндиларнинг сув ҳавзасига ташланиши, бу ҳол, шубҳасиз, ҳудудлардаги санитария ҳолатини издан чиқариши, энг ёмони, инсон саломатлигига жиддий путур етказиши мумкинлиги ҳақида ўз вақтида бонг урмаган мутасаддиларни масъулиятсизликда айблади.

Вилоят экология ва атроф-муҳитни муҳофаза қилиш бошқармаси бошлиғи С.Гаппаров, вилоят давлат санитария-эпидемиология назорати маркази бош шифокори Б.Болтабоевнинг мазкур мақолада кўтарилган масалалар юзасидан ҳисоботи тингланди ҳамда улар ишда йўл қўйган камчилик ва нуқсонлари учун жиддий огоҳлантирилди.

Шунингдек, видеоселектор давомида вилоятдаги Бўзсув канали оқиб ўтувчи ҳудудлар — Чирчиқ шаҳри, Қибрай, Тошкент, Зангиота, Янгийўл, Чиноз туманлари ҳокимлари газетада кўтарилган масалага муносабат билдира олмаган. Чунки йиғилиш ўтказилган вақтда газета чоп этилганидан уч кун ўтганига, мақолада айнан шу ҳудуд табиати, аҳолиси саломатлиги билан боғлиқ долзарб масала кўтарилганига қарамай, мазкур ҳудуд раҳбарлари газета ўқимасликлари маълум бўлиб қолган.

Мутасаддиларга кун давомида мақола билан танишиш, вазиятни ўнглаш бўйича чора-тадбирлар режасини ишлаб чиқиб, шахсан тақдим этиш вазифаси юклатилди.

Йиғилиш якунида соҳага тааллуқли барча идора ва ташкилотлар, маҳаллий ҳокимликлар, шунингдек, тегишли корхоналар раҳбарларига Бўзсув канали қирғоқларидаги ноқонуний қурилмаларни ҳисобга олиш, уларни белгиланган тартибда бартараф этиш, сувни муҳофаза қилиш зоналарига қатъий риоя этилишини таъминлаш, сув ҳавзаси ифлосланишининг олдини олишга доир комплекс чора-тадбирлар режасини зудлик билан ишлаб чиқиш ҳамда ҳаётга татбиқ қилиш вазифаси топширилди.