Миллий матбуот марказида 25 апрель куни Ўзбекистон Автомобиль йўллари давлат қўмитаси томонидан оммавий ахборот воситалари вакиллари учун «Автомобиль йўллари қуриш ишлари сифатини ошириш, йўллардан фойдаланиш жараёнига комплекс ёндашув» мавзуида матбуот анжумани ўтказилди, дея хабар бермоқда давлат қўмитаси матбуот хизмати.
Тадбирда қўмита вакиллари 2018 йилда амалга ошириладиган ишлар ҳақида тўхталиб ўтди. Қайд этишларича, Ўзбекистон бўйича автомобиль йўлларида йил давомида 7249,9 километр узунликда умумий қиймати 3,7 триллион сўмлик қурилиш-таъмирлаш ишлари амалга оширилиши белгиланган. Бу ўтган йилга нисбатан 1,8 баравар кўп.
Хусусан, қишлоқ жойларда 2754 километр ички хўжаликлараро йўлларни таъмирлаш, 600 километрдан ортиқ шаҳар ва намунавий лойиҳалар асосида қурилаётган қишлоқ массивларнинг кўчаларини ҳамда 280 километр магистрал йўлларини қуриш ва реконструкция қилиш, 3634 километр умумфойдаланувдаги автомобиль йўлларини таъмирлаш кўзда тутилган.
Бундан ташқари, Президент Шавкат Мирзиёевнинг ҳудудларга бўлган ташрифлари давомида берилган топшириқларга мувофиқ, дастурга қўшимча равишда яна 315 километр ички хўжаликлараро йўллар ва кўчаларда қурилиш ҳамда таъмирлаш ишлари бошланади.
Маълумот ўрнида, 2018 йилнинг биринчи чорак якунлари бўйича Ўзбекистондаги 210 километр ички ва минтақавий автомобиль йўллари таъмирланди.
Изоҳ (0)