Дунёнинг энг кўркам 10 аэропортидан бири Ашхободда жойлашган (фото)

Бугунги кунда жаҳондаги ривожланган мамлакатларда суперзамонавий аэропортлар барпо этилмоқда. Йўловчилар оқимининг йил сайин кўпайиб бораётганини инобатга олган Туркманистон ҳукумати ҳам пойтахт Ашхободда янги халқаро аэропорт қурди. Бу ҳақда ЎзА саҳифаларида Шарофиддин Тўлаганов ҳикоя қилди.

Янги иншоот Туркманистон авиациясининг рамзи бўлмиш парвоз қилаётган лочинни эслатади. «Ўғузхон» номи билан аталувчи халқаро аэропорт тендерда ғолиб чиққан Туркиянинг Polymeks Company компанияси томонидан лойиҳалаштирилган. Турклар Германия ва Франция компанияларини доғда қолдирди. Қайд этиш жоизки, Polymeks Company Туркманистонда қурилиш борасида катта тажрибаларга эга. Умумий ҳисобда бу компания 120 та қурилиш лойиҳасини амалга оширган.

Учта – йўловчи, VIP ва юк терминаллари бўлган янги аэропорт бир соатда 1600 йўловчига хизмат кўрсата олади. Бу бир йилда 14 миллион йўловчи Ашхободдаги халқаро аэропорт хизматидан фойдалана олишини англатади. Лойиҳа қиймати 2,2 миллиард долларга тенг аэропорт қурилиши 2013 йилда бошланди ва 2016 йилнинг сентябрь ойида фойдаланишга топширилди. 3800х75 метрлик учиш-қўниш майдончаси барча русумдаги самолётларга хизмат кўрсата олади.

Янги аэропорт таркибида 95 та турли (60 та йирик ва 35 та кичик) иншоот мавжуд. Аэровокзал мажмуаси 1200 гектар ҳудудни қамраб олган. Ашхобод аэропортида «Туркменховаёллари» авиакопаниясининг қароргоҳи жойлашган. Аэропорт атрофида автомобилларнинг бепул тураргоҳи туну кун ишлайди. Унинг яқинида эса шаҳар транспорти ва таксилар бекати бор.

Йўловчилар терминали 5 қаватдан иборат бўлиб, ички ва халқаро йўналишларга хизмат кўрсатади. Кутиш ва рўйхатга олиш заллари, информацион табло, маълумотлар бюроси, сенсорли электрон маълумотлар системаси, чипта кассалари, интернет-кафе, почта бўлими, телефон-автоматлар, автотранспорт ижараси пунктлари, валюта айирбошлаш шахобчалари, кафетерия, ресторан, duty-free дўконлари жаҳон стандартлари даражасида.

Учувчилар ва транзит йўловчилар учун меҳмонхоналар, оналар ва болалар хонаси ҳам қурилди. Болалар майдончаси, тез тиббий ёрдам кўрсатиш хонаси ҳам ноёблиги билан ажралиб туради. 2014 йилда ҳаво транспорти ходимларини тайёрлаш мактаби фаолиятини бошлаган.

Мазкур аэропорт ўзининг кўркамлиги жиҳатидан жаҳондаги 10 та аэропортдан бири сифатида тан олинди.