2017 йилда пойтахтнинг Сергели туманида 102 та кўп қаватли уй фойдаланишга топширилди. Мутасаддиларнинг маълумотига кўра, жорий йилда туманда 120 та кўп квартирали уй-жой қуриб, эгаларига топшириш режалаштирилмоқда. Олий Мажлис Қонунчилик палатасининг бир гуруҳ депутатлари бу борада амалга оширилаётган ишлар билан яқиндан танишиш мақсадида Сергели туманида бўлди, деб хабар беради ЎзА.
Парламент қуйи палатасининг Саноат, қурилиш ва савдо масалалари қўмитаси раиси ўринбосари Азамат Пардаев бошчилигидаги депутатлар дастлаб, қурилиш штабига ташриф буюрди. Депутатлар қурилиш схемаси, ҳудуд харитаси, уй-жой қуришда фойдаланиладиган жиҳозлар, материаллар билан боғлиқ маълумотлар билан танишди. Депутатларнинг сўзларига кўра, Facebook ижтимоий тармоғида аҳоли томонидан ўтган йилги топширилган янги кўп квартирали уй-жойлар юзасидан муаммолар борлиги ёзилган. Бу эса кўплаб муҳокамаларга сабаб бўлмоқда.
«Ўзшаҳар қурилиш инвест» инжиниринг компанияси директори ўринбосари Элёр Ризаевнинг қайд этишича, уй-жой фойдаланувчилари мурожаатига асосан 2017 йилда топширилган уйларнинг металл эшигида носозликлар аниқланган. Эшикларни бўяшда сифатсиз бўёқлардан фойдаланилган. Шунингдек, эшик ва ромларни ўрнатишда камчиликлар аниқланган ва барчаси бартараф этилган.
Изоҳ (0)