Америкада CBS телеканалининг янгиликлар хизмати — CBS News янглишиб, ўз сайтига АҚШ собиқ президенти катта Жорж Бушнинг рафиқаси Барбарага бағишланган таъзияномани жойлаштирди, деб ёзади Miami Herald.
Мақола сарлавҳасида «Чоп этилмасин» деган белги бўлган. Матн сайтда бироз вақт давомида кўриниб турди, сўнг уни олиб ташлашди.
Таъзияномада «икки вакили Оқ уйда ҳукмронлик қилган ва ўн йиллар давомида республикачилар сиёсатида устунлик қилган сиёсий сулола асосчиси, зукко ва киришимли» Барбара Буш сўнгги пайтларда бир неча марта касалхонага ётқизилганидан кейин 92 ёшида ўз уйида вафот этгани ҳақида айтилади.
Нашр эслатишича, аввалроқ Барбара Буш бир неча марта касалхонада муваффақиятсиз даволаниб чиққанидан кейин даволанишни тўхтатиши ва кўпроқ вақтини оиласи билан ўтказиши маълум бўлган эди.
Буш кўп йиллардан буён Грейвс касаллигидан даволаниб келади. Бу қалқонсимон безга зарар етказадиган ва тиреоид гормонлари билан заҳарланишга олиб келадиган аутоиммун касалликдир.
Изоҳ (0)