АҚШнинг Суриядаги дастлабки нишонлари маълум бўлди

АҚШнинг Сурияга биринчи зарбаси Дамашқдаги тадқиқот марказига, иккинчиси эса кимёвий қуроллар омборига йўналтирилди. АҚШнинг баёнотига кўра, мазкур омборда заррин сақланади. Бу ҳақда АҚШ штаб бошлиқлари бирлашган қўмитасининг вакили Жозеф Данфордга таяниб, «РИА Новости» хабар берди.

Аввалроқ АҚШ президенти Дональд Трамп мамлакат аҳолисига мурожаат қилиб, Сурияга зарба берилиши ҳақида эълон қилган эди. Кейинроқ зарба берилишини Буюк Британия бош вазири Тереза Мэй, шунингдек, Франция президенти маъмурияти ҳам тасдиқлаган.

Америкалик генералнинг маълум қилишича, зарба берилган ва вайрон қилинган нишонлар Сурия режимининг кимёвий қурол дастури билан боғлиқ. Унинг сўзларига кўра, Дамашқдаги илмий-тадқиқот маркази ҳарбий объект бўлиб, Сурия ҳукумати унда кимёвий ва биологик қурол устида иш олиб борган.

Пентагон томонидан маълум қилинишича, бошқа иккита объект, яъни Хомсдан ғарбда жойлашган нишонлар кимёвий қурол омборлари ҳисобланади.