Бугун, 13 апрель куни ЮНЕСКО томонидан ташкил этилган «Ўрта Осиёда ўқитувчилар билан барқарор ривожланиш» лойиҳаси доирасида тараққиёт учун узлуксиз таълим минтақавий анжумани иштирокчиларидан иборат делегация Алишер Навоий номидаги Тошкент давлат ўзбек тили ва адабиёти университетида меҳмон бўлди. Бу ҳақда университет ахборот хизмати «Дарё»га хабар берди.
Дунёнинг тўрт томонидан ташриф буюрган 60 дан зиёд меҳмонлар университетда ташкил этилган таълим жараёни, олий таълим муассасасининг моддий техник базаси, талабалар учун яратилган шарт-шароитлар билан яқиндан танишди.
Ташриф буюрганларининг аксарияти олий таълим муассасалари профессорлари бўлиб, улар ТошДЎТАУ халқаро университет мақомини эгаллашга шай эканлигини алоҳида таъкидлади.
Шунингдек, делегация аъзолари мазкур университет билан ўзлари фаолият юритаётган муассаса ўртасида яқин алоқаларни ўрнатиш таклифини ҳам билдиришди.
Меҳмонлар Алишер Навоий номидаги Тошкент давлат ўзбек тили ва адабиёти университети нафақат минтақада, балки жаҳонда ҳам моддий техник базаси ва таълим сифати нуқтайи назаридан етакчи ўринларни эгаллашга ҳақли эканлигини эътироф этди.
Изоҳ (0)