ЕЧЛ. «Ювентус» бугун камбэк қилиш учун «Реал» майдонига сафар қилади, «Бавария» эса «Севилья» билан жанг қилади

Кеча, 10 апрель санасида Европа Чемпионлар Лигасининг икки ярим финалчиси номи маълум бўлди.

Юрген Клоппнинг «Ливерпуль»и икки ўйин натижасига кўра, Хосеп Гвардиоланинг  «Манчестер Сити»сини 5:1 ҳисобида мағлуб этиб, ярим финалга йўлланмани қўлга киритди.1/4 финал босқичининг энг катта сенсацияси Римда қайд этилди. Биринчи учрашувни сафарда «Барселона»га қарши ўтказиб, 1:4 ҳисобида мағлуб бўлган «Рома» ўз майдонида Лео Месси жамоадошларини аяб ўтирмади. Ҳисоб 3:0 римлик «бўрилар» фойдасига ва «Рома» финалда!Бугун, 11 апрель санасида Европа Чемпионлар Лигасининг яна икки ярим финалчиси номи маълум бўлади.

«Бавария» — «Севилья»

Улардан бири Мюнхенда «Бавария» ҳамда «Севилья» жамоалари ўртасида кечади. Юпп Хайнкес шогирдлари дастлабки ўйинда 2:1 ҳисобида ғалаба қозонган эди. Бугун эса Монтелла шогирдлари кеча «Рома» бажарган ишни «Альянс Арена»да такрорлаб кўришга ҳаракат қилса ажаб эмас. Учрашув Тошкент вақти билан 23:45 да бошланади. Беллашув UzReport телеканали томонидан тўғридан-тўғри эфирда узатилади.

«Реал Мадрид» — «Ювентус»

Мадридда «Реал» Туриннинг «Ювентус» жамоасини қабул қилади. Дастлабки учрашув Зидан шогирдларининг 3:0 ҳисобидаги йирик ғалабаси билан якунланган эди. «Ювентус» эса бугун ўша мағлубиятни йўққа чиқариш учун майдонга тушади. Аммо туринликлар сафида бир нечта йўқотишлар бор. Жумладан, Пауло Дибала ўтган ўйиндаги олинган қизил карточка сабаб учрашувни ўтказиб юборади. «Реал» сафида эса йиғилиб қолган сариқ карточкалар сабаб, жамоа сардори Серхио Рамос майдонга туша олмайди. Учрашув 23:45 да бошланади. Ўйин Futbol-TV телеканали томонидан тўғридан-тўғри эфир орқали трансляция қилиниши режалаштирилган.