Хабар беришларича, 30 март куни соат 6:20 дан 31 март соат 14:30 гача бўлган оралиқда тана ҳароратининг кўтарилиши, ҳолсизлик, кўнгил айниши, қайт қилиш, ич кетиши, бўғимларда оғриқ каби шикоятлар билан 50 киши Бекобод шаҳар тиббиёт бирлашмасининг юқумли касалликлар бўлимига, 4 киши туғуруқ бўлимига ва яна бир киши Эпидемиология, микробиология ва юқумли касалликлар илмий-текшириш институти шифохонасига мурожаат қилган ҳамда «Ўткир гастроэнтерит. Овқат токсикоинфекцияси» бирламчи ташхиси билан даволанишга ётқизилган.
Маълум бўлишича, уларнинг бир қисми 28 март куни Бекобод шаҳридаги «Бахт уйи»да ташкил этилган никоҳ тўйида, яна бир қисми «Дилдора» тўйхонасида ўтказилган қиз базмида қатнашган. Қайд этишларича, никоҳ тўйида 300 киши, қиз базмида эса 280 меҳмон қатнашган.
Ҳар иккала муассасада дастурхонга Бекобод шаҳридаги «Нодирбек омад барака» хусусий корхонасига қарашли «Истиқлол» кафеси томонидан тайёрланган «Мужской каприз», «Японча», «Қиролича», «От шефа», «Пикантний», «Оливе», «Гўштли бодринг» салатлари, норин, чучвара, лўла-кабоб, угра, бифстроган таомлари тортилган.
«Шифохонада беморларга малакали тиббий хизмат кўрсатилмоқда, дори-дармон захиралари етарли. Беморларнинг умумий аҳволи ўртача оғирликда», — дейилади вазирлик ахборотида. Беморлардан икки нафарининг аҳволи қониқарли бўлгани учун, уларга уйларига жавоб берилган. Яна етти нафар бемор амбулатория шароитида тиббий ёрдам олганидан сўнг, аҳволи қониқарли бўлгач, уйларига кетишга рухсат берилган.
30 март куни Тошкентдан бир гуруҳ мутахассислар, жумладан, Республика санитария-эпидемиология назорат маркази бош врачи Б.Алматов Бекободга юборилган. Беморлардан олинган биологик намуналар Тошкент вилояти санитария-эпидемиология назорати марказининг лабораториясига тақдим этилган.
«Юзага келган эпидемик вазият Соғлиқни сақлаш вазирлиги томонидан алоҳида назоратга олинган», — дейилади вазирлик ахборотида.
Изоҳ (0)