Ўзбекистон Республикаси Олий Мажлиси Сенатининг XIV ялпи мажлисида «Жамоатчилик назорати тўғрисидаги қонун» лойиҳаси сенаторлар томонидан маъқулланди,— деб хабар беради «Дарё» мухбири Севара Нишонова.
2014 йил 16 апрелда Ўзбекистон Конституциясининг қатор моддаларига киритилган ўзгартиш ва қўшимчалар билан жамоатчилик назоратига конституциявий мақом берилган эди.
«Жамоатчилик назорати тўғрисида»ги қонун фуқароларнинг давлат органлари фаолияти устидан жамоатчилик назоратини таъминлаш орқали Конституцияда кафолатланган жамият ва давлат ишларини бошқаришга бўлган ҳуқуқлари амалга оширилиши билан боғлиқ муносабатларни тартибга солишдан иборат.
Бундай назорат 4 субъект, яъни Ўзбекистон Республикаси фуқаролари, фуқароларнинг ўзини ўзи бошқариш органлари, нодавлат нотижорат ташкилотлари ва оммавий ахборот воситалари томонидан амалга оширилиши кўзда тутилмоқда.
Шунингдек, қонунда жамоатчилик назоратинингобъекти, асосий принцип ва шакллари белгиланди.
Унга мувофиқ қабул қилинаётган меъёрий- ҳуқуқий ҳужжатлар, қарорлар, тармоқ ва ҳудудий ривожлантириш дастурларида жамият манфаатлари ҳамда жамоатчилик фикрининг ҳисобга олиниши, жамият, фуқаролар, юридик шахсларнинг ҳуқуқ ва қонуний манфаатларини ҳимоя қилиш соҳасидаги қонун ҳужжатлари талабларининг бажарилишини таъминлаш, улар зиммасига юклатилган жамият манфаатларига дахлдор вазифалар ижроси, ижтимоий шериклик доирасидаги битимлар, шартномалар, лойиҳа ва дастурларнинг амалга оширилиши жамоатчилик назоратининг объекти ҳисобланади.
Изоҳ (0)