Кейинги пайтларда ижтимоий тармоқларда ножўя сўзларни ёзишдан тортинмайдиган, ички ишлар органлари фаолиятини яхшилашга алоқадор бўлмаган изоҳ билдирадиган кимсалар пайдо бўлмоқда. Бу ҳақда Ички ишлар вазири ўринбосари — Тошкент шаҳар ИИББ бошлиғи генерал-майор Рустам Жўраев Яккасарой тумани аҳолиси билан бўлиб ўтган очиқ мулоқотда маълум қилди, дея
хабар беради ИИББ матбуот хизмати.
Фото: «Газета.uz»Унинг сўзларига кўра, ҳуқуқ-тартибот органлари ходимларини ижтимоий тармоқларда ҳақоратлаётган фойдаланувчилар жавобгарликка тортилади.
«Агар кимда-ким, мени барибир топа олишмайди, истаганча ички ишлар органи ходимини ҳақорат қиламан, туҳмат қилавераман, деб ўйласа қаттиқ янглишади. Шу йўналишда ишлар олиб борилган, бунинг учун маъмурий, ҳатто жиноий жавобгарликка тортилган ижтимоий тармоқ фойдаланувчилари ҳам йўқ эмас», — деди Р. Жўраев.
Хусусан, Сурхондарё вилоятида яшовчи 24 ёшли Х.Ж. атайин Тошкент шаҳар ИИББ ходимининг ғурурини топтагани учун маъмурий жавобгарликка тортилди. Шайхонтоҳур туман маъмурий судининг қарорига кўра, унга энг кам иш ҳақининг 10 баробари, яъни 1 722 400 сўм миқдорида жарима солинди.
Ушбу суд томонидан жорий йилнинг февраль ойида Тошкентда яшовчи, 1987 йилда туғилган фуқаро К.А.га 172 240 сўм миқдорида жарима солинди. Бу аёл ички ишлар органи ходимини ҳақорат қилгани учун, шунингдек, маъмурий жавобгарликка ҳам тортилди.
Тошкент шаҳар ИИББ ички ишлар органлари ходимларини обрўсизлантирган, камситган, ҳақоратлаган ва нафсониятига теккан барча фуқаролар, жумладан интернетдаги ижтимоий тармоқ фойдаланувчиларига нисбатан жиноий жавобгарликкача бўлган қонуний чора кўрилишини расман маълум қилди.
ИИББ қошида ташкил этилган Ахборот мультимедиа маркази ижтимоий тармоқларда қолдириладиган хабарлар, изоҳларни мониторинг қилиб, ички ишлар органлари ходимлари фаолиятини қадрсизлантирадиган асоссиз ва ёлғон маълумотларга раддия бериб боради.
Тошкент шаҳар ИИББ барча фуқароларни ижтимоий тармоқларда мулоқотнинг одоб-ахлоқ нормаларига амал қилиш, бир-бирига ҳурмат билан муносабатда бўлиш, ножўя сўзлардан фойдаланмаслик ва айниқса, у ёки бу воқеага изоҳ қолдираётганда қўполлашмаслик, ҳақорат қилмасликка чақирди.
Изоҳ (0)