Бугун, 26 март душанба куни Тошкентда енгил атлетика бўйича Миллий олимпия қўмитаси соврини учун Ўзбекистон чемпионати бошланди. Бу ҳақда қўмита сайтида маълум қилинди.
Республика енгил атлетика маркази мезбонлик қилаётган ушбу мусобақа катталар, 19 ҳамда 17 ёшгача бўлган спортчилар ўртасида ташкил этилди. Унда атлетлар босқон улоқтириш, найза улоқтириш, диск улоқтириш, ядро улоқтириш, шунингдек, узунликка ва баландликка сакраш йўналишларида ғолиблик учун курашга киришди.
Катталар ўртасидаги баҳслар Индонезияда бўлиб ўтадиган Осиё ўйинлари учун Ўзбекистон терма жамоаси таркибини шакллантириш мақсадида ташкил этилаётган бўлса, 19 ёшгача бўлган спортчилар ўртасидаги беллашувларда Осиё ва жаҳон чемпионатларида мамлакат шарафини ҳимоя қиладиган спортчилар номи маълум бўлади.
17 ёшгача бўлган спортчилар ўртасидаги мусобақада эса Аргентинада ўтказиладиган ўсмирлар ўртасидаги ёзги Олимпия ўйинларида қатнашадиган номзодлар саралаб олинади.
Баҳсларда Ўзбекистоннинг барча вилоятларидан 289 нафар спортчи ўз омадини синаб кўради.
Қайд этилишича, яқинда Миллий олимпия қўмитаси президенти томонидан Сурхондарё ҳамда Қашқадарё воҳасидан 51 нафар спортчи саралаб олинган. Икки кун давом этадиган мусобақада айнан ушбу спортчиларнинг иштирокига ҳам алоҳида эътибор қаратилади, дейилади хабарда.
Изоҳ (0)