Барселонада намойишлар ва полиция ўртасидаги тўқнашувлар оқибатида камида 35 киши жабрланди, дея хабар бермоқда «РИА Новости».
Барселона ва Каталониянинг бошқа шаҳарларидаги норозилик намойишлари 23 март, жума куни кечқурун — Испания Олий суди каталониялик 25 нафар сиёсий арбобга нисбатан айблов эълон қилганидан сўнг бошланди.
Испания Олий суди судьяси Пабло Лярена томонидан эълон қилинган айблов Каталонияда мустақиллиги масаласида ўтказилган референдум билан боғлиқ; айбланувчиларнинг 13 нафари исён уюштиришда гумонланмоқда.
Сиёсий арбоблардан беш нафари, жумладан, Каталония женералитети раҳбари лавозимига номзод Жорди Турул ҳибсга олинган. Бундан ташқари, судья Испаниядан ташқарида бўлиб турган беш сиёсатчи, жумладан, Карлес Пучдемонни ҳибсга олиш учун халқаро одер берган.
Барселонадаги 2 минг киши қатнашаётган норозилик намойишларидан бирида намойишчилар Испания ҳукуматининг Каталониядаги ваколатхонаси биносига яқинлашишга уринган, бироқ полиция уларнинг йўлини тўсган.
Намойишчилар тартиб посбонларига қарата тутун шашкалари ва шиша идишларни улоқтирган, полиция тўсиқларини енгиб ўтишга ҳаракат қилган. Ҳуқуқ-тартибот органлари эса тўқмоқларни ишга солган, бир неча бор бўш патронлар воситасида ҳавога қарата ўқ узган.
Хабар беришларича, намойишлар давомида ҳозиргача 35 киши тиббий ёрдам сўраб мурожаат қилган, шикастланишларнинг асосий қисми лат ейиш билан боғлиқ. 15 киши эса турли тиббиёт муассасаларига ётқизилган.
Изоҳ (0)